काठमाडौं । सरकारले सीमानामा नेपाली अलपत्र पारिएकोमा नेपाल कम्युनिस्ट पार्टी (नेकपा)का प्रवक्ता नारायणकाजी श्रेष्ठले असन्तुष्टि जनाएका छन् । प्रवक्ता श्रेष्ठले बिहीबार बिहान ट्विट गर्दै देशभित्र आइसकेकालाई सिमानामै खुला आकाशमुनि राख्न नहुने बताएका हुन् ।
नेपालभित्र प्रवेश गरिसकेका नेपालीहरुलाई सिमानामा अलपत्ररुपमा खुला बारीमा राखिएको खबर सत्य हो भने ज्यादै अमानवीय, गैरजिम्मेवार र दुखःद भएको श्रेष्ठको भनाइ छ । ‘उनीहरुलाई क्वारेन्टाइनमा राख्न कसैको आदेश चाहिँदैन । तत्काल बिषेश क्वारेन्टाइनमा राखौं,’ श्रेष्ठले ट्विटरमा लेखेका छन्, ‘विदेशमा रहेका लाखौंलाख नेपालीहरुलाई सरकारले अहिलेको सन्दर्भमा देशभित्र ल्याउन व्यवहारिकरुपमा सम्भव नहुने भन्नुको अर्थ देशभित्र आइसकेकालाई सिमानामै खुला आकाशमुनि राखिराख्नु हुनै सक्दैन।’
सुन्नै नसकिने यो कुरा संघीय सरकारको नीति हो भनेर कसले भनेको वा ब्यख्या गरेको भन्दै उनले प्रश्न गरेका छन् ।
