काठमाडौं । राष्ट्रिय प्रजातन्त्र पार्टी (राप्रपा)का प्रवक्ता मोहनकुमार श्रेष्ठले पुनः विघटित संसद पुनःस्थापनाको माग जनताको परिवर्तन चाहना विपरीत रहेको बताएका छन् ।
उनले हालको राजनीतिक परिस्थितिमा संसद पुनःस्थापना माग्नु जेनजी आन्दोलनको भावनाको अपमान हुने टिप्पणी गरेका छन् ।
श्रेष्ठले मंगलबार सामाजिक सञ्जालमा लेखेका छन्, “फेरि पनि कुनै कोणबाट विघटित संसदको पुनःस्थापनाको माग गरिनु जनताको परिवर्तनको चाहना विपरीत र जेनजी विद्रोहको अपमान हुनेछ । यो दुष्कर्ममा कोही नलागुन् ।”
उनले राष्ट्रिय मेलमिलापको नयाँ अध्याय प्रारम्भ गर्न सबै दल र शक्तिहरूलाई आह्वान गरेका छन् । पटक–पटक एउटै परीक्षणबाट फरक परिणाम आउने अपेक्षा गर्नुभन्दा देशको हितका लागि घरेलु शक्तिहरूबीच सहमति र समझदारी जरुरी रहेको उनको भनाई छ ।
उनले भनेका छन्, “ढिलो चाँडो निर्वाचनमा जानु नै छ, त्यसअघि नै नवीन समझदारी सुनिश्चित गरौं। दलभित्र र दल बाहिर नवीन समझदारीको बहस प्रारम्भ गरौं— देशले खोजेको अग्रगमन यही हो ।”
