काठमाडौं । पूर्वराजा ज्ञानेन्द्र शाहले राज्य प्रवलीकरण र गतिशील व्यवस्थापनका प्रमुख परिपाटीमा जनमनोभावनाको ख्याल राखेर समय सापेक्ष सुधार गर्दै अघि बढ्नु जरुरी रहेको बताउनुभएको छ ।
२०८२ विजय दशमीको अवसरमा एक शुभकामना सन्देश दिदै पूर्वराजा शाहले आउँदो पुस्ताको लागि नयाँ समय, आशा, विश्वासका साथ अघि बढाउने जिम्मेवारी पुरा गर्ने सबैको साझा कर्तव्य भएको पनि जनाउनु भएको छ ।
सन्देशमा मुलुकले नयाँ पुस्ताको इच्छाशक्ति र जिम्मेवारीलाई आत्मसात् गर्दै अघि बढ्न जरुरी रहेको उल्लेख गरिएको छ । यसैगरी विगतमा देखिएका असफलता र कमीकमजोरीलाई सच्याएर भविष्यतर्फ अघि बढ्नु आवश्यक रहेको उहाँले सन्देशमा उल्लेख गर्नुभएको छ।
सन्देशमा भनिएको छ -आधुनिक प्रविधि, विज्ञान र शिक्षा अपनाउँदै राष्ट्रलाई प्रतिस्पर्धी बनाउनुपर्ने आवश्यकता रहेको र युवापुस्ताले राष्ट्रिय भावना, अनुशासन, नवीन सोच र जिम्मेवारीका साथ योगदान दिनुपर्ने जनाउनु भएको छ ।
