काठमाडौँ । नेपाली काँग्रेसका नेता एवं पूर्वमन्त्री रमेश रिजालले कार्यसम्पदान समितिको बैठकले गरेको निर्णयका आधारमा पार्टीलाई अगाडि बढाउने बताउनुभएको छ ।
पार्टी मुख्यालय सानेपामा सञ्चारकर्मीसँग कुरा गर्दै उहाँले यस्तो बताउनुभएको हो । पार्टीको विशेष महाधिवेशन गर्ने÷नगर्नेबारे निर्णय गर्न छिटै पार्टीको कार्यसम्पादन समितिको बैठक बस्ने उहाँको भनाइ छ । उहाँले जेन जी आन्दोलनको क्रममा नेपाली काँग्रेसजस्तो अग्रगामी र लोकतान्त्रिक पार्टीका संरचनामाथि भएको आक्रमण निन्दनीय भएको भन्दै खेद व्यक्त गर्नुभयो । उहाँले जेनजी पुस्ताको सहभागिता र उनीहरुको मागलाई सम्बोधन गर्नेगरी पार्टी अगाडि बढ्ने कुरामा आफूहरु गम्भीर रहेको पनि बताउनु भयो ।
उहाँले भन्नुभयो, ‘यो नहुनुपर्ने भयो । पार्टीमाथि आक्रमण गर्नु सर्वथा निन्दनीय विषय हो । म यसको निन्दा गर्छु । विचार बोकेको पार्टी हो नेपाली काँग्रेस । अगामी दिनमा पार्टीको दोस्रो तहमा बसेका मान्छेहरुले सम्भावना त छँदैछ नि । अब पार्टीको पदाधिकारी, कार्यसम्पदान समिति लगायतको बैठक बस्छ बैठकले निकालेको निचोडका आधारमा हामी अगाडि बढ्छौं । विषेश महाधिवेशन गर्ने कि नगर्ने विषय पनि बैठकले नै निर्णय गर्छ । जेनजी पुस्ताको मागलाई पार्टीले सम्बोधन गर्नुपर्छ ।’
गत भदौ २३ र २४ मा भएको जेन—जी पुस्ताको आन्दोलनको क्रममा नेपाली काँग्रेसको केन्द्रिय तथा अधिकांश जिल्ला र प्रदेश कार्यालयहरुमा समेत व्यापक क्षति भएको छ । यससँगै पार्टीभित्र नेतृत्व हस्तान्तरण बहस चुलिएको छ ।
