काठमाडौं । अमेरिकी कम्पनीहरुलाई बाहिरी मुलुकबाट कर्मचारी ल्याउन कडाइ गरिएको छ । राष्ट्रपति डोनाल्ड ट्रम्प प्रशासनले कर्मचारी ल्याउन कडाइ गरेको हो ।
अब एच–१बी भिसामा कर्मचारी ल्याउने रोजगारदाता कम्पनीले सरकारलाई प्रतिवर्ष १ लाख अमेरिकी डलर शुल्क तिर्नुपर्ने छ ।
राष्ट्रपति डोनाल्ड ट्रम्पले एच–१बी भिसामा प्रतिवर्ष १ लाख डलरको आवेदन शुल्क लगाउने कार्यकारी आदेशमा हस्ताक्षर गरेका हुन् ।
ट्रम्पले यो कदमले अमेरिकी कम्पनीलाई आफ्नै देशका कामदारलाई प्राथमिकता दिन प्रोत्साहित गर्ने र यसबाट उच्च दक्षता भएका विदेशी कामदारलाई रोजगारीको बाटो खुलाउने दाबी गरे ।
उनका अनुसार अब एच–१बी भिसा प्राप्त गर्न कम्पनीले ठूलो रकम तिर्नुपर्ने भएकाले यो कार्यक्रम दुरुपयोग रोक्न सहयोग पुग्नेछ ।
टेक्नोलोजी क्षेत्रमा ठूलो संख्यामा भारतीय र चिनियाँ दक्ष जनशक्ति ल्याइँदै आएकोमा यो कदमले सीधा असर पार्ने अनुमान गरिएको छ ।
अमेरिकी वाणिज्य सचिव हावर्ड लुटनिकका अनुसार आवेदन शुल्क वार्षिक १ लाख डलर वा तीन वर्षका लागि ३ लाख डलर एकैपटक तिर्ने व्यवस्था राख्नेबारे गृह सुरक्षा विभागसँग छलफल भइरहेको छ ।
यो योजना अनुसार विदेशीले अमेरिकाको स्थायी बसोबास (ग्रीन कार्ड) पाउन १० लाख डलर तिर्नुपर्नेछ । कुनै कम्पनीले आफ्ना कर्मचारीका लागि प्रक्रिया छिटो पार्न २० लाख डलर तिर्न सक्नेछ ।
