शिक्षा, विज्ञान तथा प्रविधि मन्त्रालयले सबै विश्वविद्यालयलाई तत्काल अनलाइन वा दूरशिक्षाको माध्यमबाट पढाइ सञ्चालन गर्न निर्देशन दिएको छ । मन्त्रालयले मुलुकका सबै विश्वविद्यालयको अवस्थाबारे जानकारी लिँदै सम्भव भएसम्म अनलाइन कक्षा सञ्चालन गर्न निर्देशन दिएको जनाएको छ । शिक्षा, विज्ञान तथा प्रविधिमन्त्री गिरिराजमणि पोखरेलले केही दिनअघि सबै विश्वविद्यालयका उपकुलपतिसँग भिडियो कन्फ्रेन्समार्फत सबै विश्वविद्यालयको पछिल्लो अवस्थाबारे जानकारी लिएका थिए । त्यही बेला मन्त्री पोखरेलले मन्त्रालयमा आ–आफ्नो पढाइ शुरू गर्ने योजनासहित प्रगति विवरण पेस गर्न निर्देशन दिएका थिए । लगत्तै मन्त्रालयमा सबै विश्वविद्यालयले प्रतिवेदन पेस गरेको थियो ।
मन्त्रालयका उच्च शिक्षा महाशाखा प्रमुख सहसचिव रामशरण सापकोटाले सबै विश्वविद्यालयले प्रतिवेदन पेस गरेको र सोहीअनुसार काम शुरू गरिसकेको जानकारी गराए । उनका अनुसार मुलुककै जेठो त्रिभुवन विश्वविद्यालयले स्नातकोत्तर, एमफिल र पीएचडी तहको पठनपाठन अनलाइनमार्फत शुरू गरिसकेको, केही विभागले कार्ययोजना निर्माण गरिसकेको जनाएका थिए ।त्यस क्रममा अधिकांश विश्वविद्यालयले मेडिकल र ननमेडिकल विषयमा अध्ययन गरिरहेका विद्यार्थीलाई स्वयंसेवकका रूपमा परिचालन गरेको विवरण पेस गरेका छन् । पोखरा विश्वविद्यालयले अनलाइनबाट पढाउन शुरू गरेको र करिब ९ सय विद्यार्थीलाई कोरोना भाइरस रोकथामको गर्न स्वयंसेवकका रूपमा परिचालन गराएको प्रतिवेदन दिएको छ ।
काठमाडौं विश्वविद्यालयले मास्क र सेनिटाइजर उत्पादन गरी विभिन्न निकायमा निःशुल्करूपमा वितरण गरेको, अनलाइन कक्षा सञ्चालन, ज्वरो क्लिनिक र कोरोना भाइरस (कोभिड–१९) परीक्षण गरेको उल्लेख गरेको छ । त्यस्तै सुदूरपश्चिम विश्वविद्यालयले सेनिटाइजर निर्माण गरी वितरण गरेको, माइक्रो बायोलोजी, सिभिल, कृषि, सूचना प्रविधिलगायतका विषयका कक्षा अनलाइनमार्फत सञ्चालन गरेको र ३ सय ४६ जना स्वयंसेवक परिचालन गरेको उल्लेख गरेको छ । कृषि तथा वन विश्वविद्यालयले अनलाइन कोर्स सञ्चालन गरेको र विभिन्न क्षेत्रमा १ सय ७५ स्वयंसेवक परिचालन गरेको प्रतिवेदन मन्त्रालयमा पेस गरेको छ । सो विश्वविद्यालयले तितेपातीबाट सेनिटाइजर निर्माण गरी बिक्री शुरू गरेको जनाएको छ ।
महाशाखा प्रमुख सापकोटाले मन्त्रालयले दिएको जिम्मेवारीअनुसार काम भइरहेको जानकारी दिए । उनले भने– ‘सबै विश्वविद्यालयले आफ्नो योजनाअनुसार तालिका तयार गरी पेस गरेका छन् ।’ नेपाल संस्कृत विश्वविद्यालयको मुख्यालयमा कोरोना भाइरस उपचार केन्द्र रहेका कारण तत्काल पढाइ सुचारु गर्न कठिन भएको जनाइएको छ । लुम्बिनी बौद्ध र राजर्षी जनक विश्वविद्यालयले योजना बनाइरहेका छन् । सहसचिव सापकोटाले सबै विश्वविद्यालयलाई सम्भव भएसम्म अनलाइन, टिभी, एफएम र अन्य कुनै पनि माध्यमबाट पढाइ शुरू गर्न निर्देशन दिएको बताए । मन्त्रीज्यूको निर्देशनअनुसार १० वटै विश्वविद्यालयले आ–आफ्नो योजना पेस गरेको महाशाखाले जनाएको छ । नेपाल समाचारपत्र दैनिक
