जनकपुरधाम । कोरोना पोजेटिभमा जनकपुरधामका व्यक्ति रहेको स्वास्थ्य मन्त्रालयले भनेपछि जनकपुरधामवासी त्रसित भएका छन् । लकडाउनका मामलामा पछाडि रहेको जनकपुरधामको सडकमा मानिसहरू केही समयका लागि देख्न छाडिएको थियो । कुन टोलको व्यक्ति संक्रमित भएका रहेछन् भनी सबै यही पत्ता लगाउनमा व्यस्त थिए । बाहिरवाट पनि निकै संख्यामा विभिन्न व्यक्तिको घरमा फोन आएको थियो । प्रादेशिक अस्पताल जनकपुरधामका एक स्वास्थ्यकर्मीका अनुसार पत्रकारबाहेक दर्जनौं शुभचिन्तकले टेलिफोन गरी संक्रमितबारे जानकारी लिएका थिए ।
पाँच दिनपहिले जनकपुरधामस्थित प्रादेशिक अस्पतालमा पीसीआर टेस्टमा नेगेटिभ देखिएका १४ वर्षीय एक युवामा बिहीबार टेकुको रिपोर्टमा कोरोना पोजेटिभ देखिएको धनुषाका प्रमुख जिल्ला अधिकारी कोषहरि निरौलाले बताए । आरडीटी टेस्ट नेगेटिभ आएका बालकको पीसीआर पोजेटिभ आएको छ । सर्लाही धनकौल गाउँपालिकाका १४ वर्षीय बालकमा कोरोनाको संक्रमण देखिएको हो । ती बालक भारतको दिल्लीबाट केही दिनअघि आएका थिए । जनकपुरधाम प्रादेशिक अस्पतालमा आरडीटी जाँच गर्दा नेगेटिभ आएपछि उनलाई घर फर्काइएको थियो ।
ती बालकको जनकपुरधाममै उपचार गरिनेछ । घरमा अन्य व्यक्तिमा पनि संक्रमण फैलिएको हुन सक्ने खतरा बढेको स्वास्थ्यकर्मीले बताएका छन । घरकै सबैलाई आइसोलेसनमा राखी कोरोना टेस्ट गर्न स्वास्थ्यकर्मीले गरेका छन् । प्रदेश २ मा अहिलेसम्म ६०९ जना कोरोना भाइरसका शंकास्पद बिरामीको थ्रोट स्वाब परीक्षण गरिएको छ, जसमध्ये चार जनाको रिपोर्ट यसअघि नै पोजेटिभ देखिसकेको छ भने ५९० जनाको रिपोर्ट नेगेटिभ आएको छ । १५ जनाको रिपोर्ट आउन बाँकी रहेको छ । राजधानी दैनिक
