काठमाडौं । नेकपा एमालेको जारी विधान महाधिवेशनको दोस्रो दिन आज विभिन्न प्रतिवेदनमाथि समूहगत छलफल हुने भएको छ ।
आज सबैभन्दा पहिला थप तीन प्रतिवेदन पेस हुने भएका छन् । निर्वाचन आयोग, लेखा र अनुशासनको आयोगका प्रतिवेदन आज पेस हुने बताइएको छ ।
स्थायी कमिटी सदस्य कर्णबहादुर थापाको फरक मत पनि आजै पेश हुने छ । थापाको फरक मत हिजै पेश गर्ने कार्यसूची राखिएको भए पनि पेश हुन सकेन ।
पहिलो दिन उद्घाटनसँगै अध्यक्ष केपी शर्मा ओलीले राजनीतिक प्रतिवेदन पेश गर्नुभयो । त्यसपछि उपाध्यक्ष विष्णु पौडेलको विधान संशोधन, महासचिव शङ्कर पोखरेलको सांगठानिक र सल्लाहकार परिषद्का अध्यक्ष अमृतकुमार बोहराको प्रतिवदन पेस भएका थिए ।
आज बिहान ८ बजेदेखि महाधिवेशन सुरु हुने र १० बजे प्रतिवेदन पेस गरिसकेर समूहगत छलफल थाल्ने तयारी छ ।
प्रतिनिधिहरुलाई १० समूहमा विभाजन गरेर छलफल गरिने छ ।
महाधिवेशनको समसामयिक प्रस्ताव लेखनको संयोजकको जिम्मेवारी भने योगेश भट्टराईलाई दिइएको छ । महाधिवेशनमा देशभरिका दुई हजार २६ जना प्रतिनिधि र आयोजकका हैसियतमा ३१५ जना थप गरी कूल दुई हजार ३४१ जनाको सहभागिता रहेको छ ।
