काठमाडौं । प्रधानमन्त्री केपी शर्मा ओली नेतृत्वमा चीन गएको उच्चस्तरीय नेपाली प्रतिनिधिमण्डल हिमालय एअरलाइन्स्को विमानबाट नेपाल फर्किएको छ । एयरबस ३२० (Registration: 9N-ALW) बाट प्रधानमन्त्री ओली नेतृत्वको उच्चस्तरीय टोली गएराति स्वदेश फर्किएको हो ।
चीनको थियानजिन सहरमा आयोजित २ दिन शाङ्घाई सहयोग सङ्गठनको शिखर सम्मेलनमा सहभागी भई प्रतिनिधिमण्डल नेपाल फर्किएको हो ।
यो भ्रमणमा प्रधानमन्त्रीज्यूसँगै शिक्षा, विज्ञान तथा प्रविधि मन्त्री माननीय श्री रघुजी पन्त, संस्कृति, पर्यटन तथा नागरिक उड्डयन मन्त्री माननीय श्री बद्रीप्रसाद पाण्डे, प्रधानमन्त्रीका आर्थिक तथा विकास सल्लाहकार डा। युवराज खतिवडा, संसद सदस्यहरू र विभिन्न मन्त्रालयका वरिष्ठ सरकारी अधिकारीहरू सहभागी थिए ।
प्रधानमन्त्री र प्रतिनिधिमण्डललाई स्वागत गर्न हिमालय एअरलाइन्स्का उपाध्यक्ष (प्रशासन) विजय श्रेष्ठ उपस्थित हुनुहुन्थ्यो । विमान बेइजिङ क्यापिटल अन्तर्राष्ट्रिय विमानस्थलबाट १८.२१ बजे (चीनको स्थानीय समय) प्रस्थान गरी नेपाली समयानुसार २१:२७ बजे काठमाडौंस्थित त्रिभुवन अन्तर्राष्ट्रिय विमानस्थलमा सफलतापूर्वक अवतरण भयो ।
यस उच्चस्तरीय उडानको सफल व्यवस्थापनले हिमालय एअरलाइन्स्को राष्ट्र सेवाप्रतिको १० वर्षको समर्पण र देशको यस्ता महत्त्वपूर्ण उडान सफलतापूर्वक संचालन गर्न सक्ने क्षमताको पुष्टि गरेको छ । एअरलाइन्स्ले आफूलाई राष्ट्रका लागि भरपर्दो साझेदारको रूपमा स्थापित गरेको दाबी गरेको छ ।
