बेइजिङ । चीनले दोस्रो विश्वयुद्ध अन्त्यको ८० वर्षको अवसरमा आज विशाल सैन्य परेड आयोजना गरेको छ ।
राजधानी बेइजिङमा जारी सैन्य परेडमा प्रधानमन्त्री केपी शर्मा ओली पनि सहभागी हुनुहुन्छ ।
इतिहासकै सबैभन्दा ठूलो यो परेडमा चिनियाँ राष्ट्रपति सी जिनपिङले विश्वका नेताहरूलाई बोलाएका छन् ।रुसी राष्ट्रपति भ्लादिमिर पुटिन र उत्तर कोरियाली नेता किम जोङ उन पनि सहभागी छन् ।
यो कार्यक्रममा चीनले आफ्नो सैन्य शक्ति र भविष्यको दृष्टिकोण प्रस्तुत गरेको हो ।
चीनले यस्तो विजय दिवसको अवसरमा सैन्य परेडको आयोजना गरेको यो दोस्रो पटक हो । यसअघि, १० वर्ष पहिले सन् २०१५ मा पहिलो पटक भव्य परेडको आयोजना गरिएको थियो ।
यो परेडमार्फत चीनले सैन्य शक्तिको भव्य प्रदर्शन गरेको छ । जसमा उन्नत सैन्य उपकरणहरू जस्तै ड्रोन, हाइपरसोनिक मिसाइल, र फाइटर जेटहरू प्रदर्शनमा राखिएका छन् ।
परेडमा जनमुक्ति सेना (पीएलए) का सयौँ विमान प्रदर्शन गरिएको छ ।
परेडमा ८० बिगुलरहरू उपस्थित छन् । जसले दोस्रो विश्वयुद्धमा साम्राज्यवादी जापानको पराजय भएको ८० वर्षको सङ्केत गर्छ । यसका अतिरिक्त, १ हजार भन्दा बढी सङ्गीतकार १४ लहरमा उपस्थित भएका छन् । जसले सन् सन् १९३१ मा जापानको मन्चुरिया आक्रमणपछि चीनको प्रतिरोधको प्रत्येक वर्षलाई प्रतिनिधित्व गर्नेछ ।
तियानमेन स्क्वायरमा उपस्थित दर्शकहरूलाई हरियो, रातो र सुनौलो रङका कुर्सीहरूमा बसाइएको छ, जसले क्रमश: उर्वर भूमि, जनताको बलिदान र शान्तिको प्रतीक गर्दछ ।
‘विजय दिवस’ परेडमा ४५ सैनिक टुकडी सहभागी छन् । जहाँ उनीहरू बेइजिङको तियानमेन स्क्वायरमा सीको अगाडि मार्च पास गर्नेछन् ।
फोटो -रासस र सिन्ह्वा
