काठमाडौँ । नवनिर्वाचित संघीय संसद प्रतिनिधि सभा राज्य व्यवस्था तथा सुशासन समितिका सभापति ईश्वरीदेवी न्यौपानेले आफूले निष्पक्ष, पारदर्शी र परिणाममुखि कार्यशैली अवलम्वन गर्ने बताउनुभएको छ ।
समितिको मंगलवार सिंहदरबारमा बसेको बैठकमा बोल्दै उहाँले समितिलाई सबै सांसदहरुको मत लिएर अघि बढाउने प्रतिवद्धता व्यक्त गर्नुभएको हो । उहाँले आफूबाट काम गर्ने क्रममा गल्ती भए सच्याउनका लागि तत्काल सुुझाव दिन पनि सबै सांसदहरुलाई आग्रह गर्नुभयो । विधेयक निर्माण, सुशासन र जनताको पक्षमा काम गर्न आफू एककदम पनि पछाडि नहटने सभापति न्यौपानेको भनाई थियो । उहाँले हरेक सांसदका कुरालाई सुनेर आफू अघि बढन चाहेको पनि बताउनु भयो ।
सभापति न्यौपानेले भन्नुभयो, ‘समितिलाई व्यवस्थित ढंगले चलाउ भन्ने नै मेरो कोशिस हुन्छ । म सफल हुनु भनेको फेरी म एक्लो सफल हुुन होइन नि । सिंगो समिति नै सफल हुनु हो, तपाईहरु पनि सफल हुनु हो । तपाईहरु सबै एक्टिभ भएर मात्रै सिंगो समिति सफल हुने हो । व्यक्तिगत रुपमा सफल हुने भन्ने कुरा होइन । त्यसैले माननीयजीहरु खुला रुपले म पनि मान्छु हुँ । मेरो पनि गल्ती कमजोरी हुनसक्छ । खुला रुपले मलाई तपाईहरुले भन्न पनि सक्नु हुन्छ । जे पनि मलाई भन्न सक्नु हुन्छ ।
किनभने यहाँ विधेयक बनाउने कुरा, सुशासनको कुरा, जनताको पक्षमा कुरा त्यो गर्नलाई म एककदम पनि पछाडि हटने छैन । तपाईहरुको साथमा छु । त्यसैले माननीय सदस्यज्यूहरु यहाँहरुले प्रकट गर्नु भएको शुभकामना र बधाईका लागि धन्यवाद प्रकट गर्दछु । यहाँहरुको सुभेच्छा र विश्वासले मलाई थप उत्साह र जिम्मेवारी बोध गराएको छ । आगामी दिनमा समितिको बैठकमा हामी सबैको सहयोको अपेक्षा गरेको छु । हरेक माननीयको विचार र सुझावलाई सम्मान गर्दै निष्पक्ष, पारदर्शी र परिणाममुखि कार्यशैलीलाई म निरन्तर अगाडि बढाउने संकल्प गर्दछु । तपाईहरुको निरन्तर सहयोगको अपेक्षा गरेको छु ।’
सभापति न्यौपानेले आफूले काम गर्ने क्रममा सांसदहरुमाथि विभेद गर्ने कुनै मनशाय नराख्ने पनि बताउनु भयो ।
