काठमाडौं । नेपालमा कोरोना संक्रमितमध्ये अधिकाशंमा लक्षण देखिएको छैन । कतिपयले त साता दिनमै कोरोनामाथी जित पनि निकालेका छन् । तर, विश्वको परिवेश भने अलिक फरक छ । त्यहा धेरै मानिस कोरोनाको संक्रमणबाट मृत्यु भईसकेको छ । तर, नेपालमा संक्रमितमा लक्षण नै नदेखिएपछि स्वास्थ्य तथा जनसख्या मन्त्रालयले कोभिड– १९ को अणुवांशिक (जिन) को अध्ययन गर्ने भएको छ । यस सम्बन्धमा मन्त्रालयको नेपाल स्वास्थ्य अनुसन्धान परिषद्ले जिनसँग सम्बन्धित विभिन्न वैज्ञानिकसँग छलफलसमेत गरेको छ । कोभिड–१९ का विभिन्न जिन रहेकाले अध्ययनबाट नेपालमा रहेको कुन जिन हो भन्ने पत्ता लगाइने छ । नेपाल स्वास्थ्य व्यवसायी परिषद्का रजिष्ट्रार पुष्पराज खनालले नेपालमा आएको जिन कस्तो प्रकारको रहेको भनेर अध्ययन गरिन थालिएको जानकारी दिए ।
उनका अनुसार कोभिड–१९ का कारण अरू देशमा मानिसको ज्यान गइरहेको अवस्थामा नेपालमा भने संक्रमितको अवस्थामा सामान्य रहेकाले जिनको अनुसन्धान गर्न थालिएको हो । उक्त अध्ययनका लागि नेपालमा रहेका भाइरोजीमा काम गरिरहेका जिनविज्ञ, संस्था र विदेशमा रहेका वैज्ञानिकसँग छलफल गरेको छ । अहिलेसम्मको अध्ययनले दोस्रो ‘यहाँ कोभिड–१९ को लक्षण बिना नै संक्रमण देखिएको छ । कुन चाहिँ जिनले मानिसमा संक्रमण भइरहेका छन’, उनले भने, ‘त्यसैले भाइरसको कुन चाहिँ जिन नेपालमा बढी रहेको छ । त्यसको अध्ययन गर्न थालेका हौँ ।’ परिषद्ले संक्रमितहरुकै स्वाब र रगतबाट जिनको प्रकार पत्ता लगाउने हो । अध्ययनबाट नेपालमा अमेरिका, चीन, भारत र अन्य देशमा रहेको जिन छ वा छैन भनेर पनि पत्ता लगाइने कोभिड– १९ सम्बन्धित प्रयोगशाला सल्लाहाकार समितिका सदस्यसमेत रहेका खनालले बताए ।
उनका अनुसार संक्रमित ८२ जनाको स्वाब संकलन गरी जिन कुन प्रकारको रहेको भन्ने पत्ता लगाइने छ । उनले जिनको अध्ययन गरेर नेपालमा रहेको जिनको तहगत वर्गीकरण गरिनेसमेत बताए ।जिन पत्ता लगाएपछि कोभिड– १९ को उपचारका लागि आवश्यक भ्याक्सिन र औषधि पत्ता लगाउन सकिने खनालको भनाइ रहेको छ । ‘इटाली, वुहान र अमेरिकामा संक्रमण देखिएका मानिस मरिरहेका छन् तर यहाँ त मरेका छैनन’, उनले भने, ‘मानिसको मेडिकल लक्षण चिह्न (क्लिनिकल साइन सिन्ट्रोम) छैन । मान्छे देख्दा सामान्य छ तर संक्रमण देखिएको छ । के रहेछ । यो जिनको कारणले हो ।’ मन्त्रालयका अनुसार नेपालभित्रका वैज्ञानिकले नै ती जिनको वर्गीकरण गर्नेछन् । चीन, अमेरिका, भारतलगायत देशले पनि कोभिड–१९ को जिनबारे अनुसन्धान शुरु गरिसकेका छन् । उनले संक्रमणले मानिसको रगतमा कुन कुन चीज उत्पन्न भएको छ त्यो पत्ता लगाउने बताए । जिनको अध्ययनका लागि मन्त्रालयले काठमाडौँ विश्वविद्यालय र नेपाल विज्ञान तथा प्रविधि प्रज्ञा प्रतिष्ठान ९नाष्ट०मा रहेका जेनेटिक ल्याबमा अनुसन्धान गरिने जनाएको छ । सौर्य दैनिक
