काठमाडौं । प्रधानमन्त्री केपी शर्मा ओलीले आज प्रतिनिधि सभा बैठकमा विशेष सम्बोधन गर्नुहुने भएको छ ।
आज दिउँसो १ बजे बस्ने बैठकमा प्रधानमन्त्री ओलीले सम्बोधन गर्नुहुने छ ।
सांघाइ सहयोग संगठन (एससीओ)को शिखर सम्मेलनमा भाग लिन भोलि चीन जान लागेका प्रधानमन्त्री ओलीले आज संसद्मा सम्बोधन गर्न लाग्नुभएको हो ।
प्रधानमन्त्री ओलीले भदौ १४ देखि १८ सम्म चीन भ्रमण गर्ने तालिका परराष्ट्र मन्त्रालयले सार्वजनिक गरेको छ ।
प्रधानमन्त्री ओलीले आफ्नो भ्रमणका बारेमा सदनलाई जानकारी गराउने उद्देश्यले प्रतिनिधिसभामा सम्बोधन गर्न लागेका उहाँको सचिवालयले जनाएको छ ।
चीन भ्रमणको क्रममा प्रधानमन्त्री ओलीले लिपुलेक मामिलामा भारत र चीनसँग प्रष्ट कुरा राख्ने बताउनुभएको छ ।
चीनमा रहँदा प्रधानमन्त्री ओलीले चिनियाँ राष्ट्रपति सी चिनफिङ, रुसका राष्ट्रपति भ्लादिमिर पुटिन लगायतसँग पनि भेटवार्ता गर्ने कार्यक्रम तय भएको छ ।
संसद्मा प्रधानमन्त्रीले सम्बोधन गर्ने बैठकमा पनि विपक्षी दलहरु रास्वपा र राप्रपाको अवरोध भने कायमै रहने भएको छ । यी दुई दलले गत जेठ १३ गतेदेखि प्रतिनिधिसभामा अवरोध गर्दै आएका छन् ।
भिजिट भिसा प्रकरणको छानबिन गर्नुपर्ने माग गर्दै उनीहरुले विरोध जारी राखेका हुन् ।
