काठमाडौं । पूर्वराष्ट्रपति विद्यादेवी भण्डारी आजदेखि राजनीतिमा थप सक्रिय हुनु हुने भएको छ । नेकपा एमालेले सदस्यता नवीकरण नगरिदिएको भए पनि उहाँले राजनीतिक यात्रालाई थप गतिशील बनाउन लाग्नुभएको हो ।
पूर्वराष्ट्रपति भण्डारीले एमालेका तत्कालीन महासचिव मदन भण्डारी फाउन्डेसनमार्फत आफ्ना गतिविधि अघि बढाउन लाग्नुभएको हो ।
जननेता मदन भण्डारीको ७५ औं जन्मजयन्तीलाई भव्यतापूर्वक सम्पन्न गर्ने उद्देश्यले मदन भण्डारी फाउन्डेसनद्वारा गठित ‘मदन भण्डारी ७५ औं जन्मजयन्ती मूल व्यवस्थापन समितिको कार्यालय’ को पूर्वराष्ट्रपति भण्डारीले आज उद्घाटन गर्ने कार्यक्रम छ ।
काठमाडौंको नयाँ बानेश्वरस्थित लाखेचौर मार्गमा कार्यालय उद्घाटन गर्न लागिएको हो ।
यो कार्यक्रममा पूर्वराष्ट्रपति भण्डारीले आफ्नो आगामी राजनीतिक यात्राका विषयमा समेत जानकारी दिनुहुने बताइएको छ ।
दुई पटक राष्ट्रपति बनिसकेकी भण्डारीलाई फेरि पार्टी राजनीतिमा सक्रिय नबन्न एमालेले सुझाव दिँदै आएको छ । तर उहाँको सक्रियता रोकिएको छैन ।
तीन दिनअघि मात्र कोशी प्रदेशमा पुग्नुभएकी भण्डारीले आफू राजनीतिक यात्रामा अघि बढिसकेकाले पछाडि फर्केर नहेर्ने बताउनुभएको थियो ।
उहाँले गएको असार १४ मै एमालेको राजनीतिमा फर्किएको घोषणा गर्नुभएको थियो । तर एमालेले भण्डारी पूर्वराष्ट्रपतिकै हैसियतमा बस्नुपर्ने भन्दै सदस्यता खारेज गरिदिएको छ ।
त्यसपछि उहाँले मदन भण्डारी फाउन्डेसनमार्फत सक्रिय बन्दै आउनुभएको हो ।
विद्याका श्रीमान् एवं दिवंगत नेता मदन भण्डारीको नाममा रहेको फाउन्डेसनले विभिन्न कार्यक्रम गर्दै आएको छ । फाउन्डेसनले भण्डारीको हीरक जयन्ती भव्यताका साथ मनाउने तयारी गरेको छ ।
फाउन्डेसनले वर्षभरी नै देशभर विभिन्न कार्यक्रम गर्ने तयारी गरेको छ । त्यसको अगुवाई गर्दै पूर्वराष्ट्रपति भण्डारीले पनि देशव्यापी पुग्ने र आफ्ना गतिविधि बढाउने तयारी गरिरहनुभएको हो ।
