काठमाडौं: द्वन्द्वपीडित अगुवाहरूले संक्रमणकालीन न्यायमा छलछाम नगर्न सरकारलाई खबरदारी गरेका छन् ।
आज सिंहदरबारमा द्वन्द्वपीडित अगुवाहरूले प्रधानमन्त्रीका संक्रमणकालीन न्याय सल्लाहकार अग्नि खरेल सहित गृहमन्त्री रमेश लेखक र माओवादी प्रतिनिधि खिमलाल देवकोटा सहितको समूहसंग भेटघाट गरी यस्तो खबरदारी गरेका हुन् ।
बैठकमा सहभागी द्वन्द्वपीडित साझा चौतारीका संस्थापक अध्यक्ष सुमन अधिकारीले भन्नुभयो, राज्यलाई धेरै छलछाम नगर्न, तत्काल दुवै आयोग खारेज गरी पीडित प्रतिनिधित्व सहितको नयाँ प्रक्रिया सुरु गर्न पीडितहरुको समूहले शसक्त आफ्नो धारणा राखेका छन् ।
अधिकारीले भन्नुभयो, आयोग गठनको प्रकृया क्याप्चर गर्नुभयो, प्रक्रिया गलत भो । राजनीतिक भागवण्डा गर्नुभयो, बफादार पात्र तयार गर्नुभयो, प्रक्रियामा पूरै नाटक गर्नुभयो । अहिलेको प्रक्रिया र पात्र दुबै गलत छ । आयोग गठनका विरुद्धमा हामी मुद्दा लिएर अदालत जान्छौं । साथै नागरिक आयोग गठन गर्न बाध्य नपार्न पनि खबरदारी गरेका छौं ।
उहाँहरुले यसै आयोगलाई निरन्तरता दिएर जान आग्रह गर्नु भएको थियो । विदेशीहरुलाई हामी काम गरिरहेका छौं, इन्गेज गरिरहेका छौं भनेर जवाफ दिने गरेको हाम्रो बुझाइ छ ।
सरकारले लामो छलफल र बहसपछि यसअघि सत्य निरुपण तथा मेलमिलाप आयोग र बेपत्ता नागरिकको छानबिन आयोग गठन गरिसकेको छ । तर यी दुबै आयोगको गठन र यसका पदाधिकारीको छनौटलाई लिएर सुरुदेखि नै विवाद हुँदै आएको छ ।
