काठमाडौं । सरकारले लिम्पियाधुरा, कालापानी र लिपुलेक क्षेत्रलाई समेटेको नयाँ नक्साअनुसार निशान छाप परिर्वतन गर्ने संविधान संशोधन विधेयक संसदमा पेश गर्दैछ । आइतवार विहान ११ बजेसम्म संसद बैठकमा कानुन, न्याय तथा संसदीय मामिला मन्त्री डा। शिवमाया तुम्बाहाङफेले प्रस्तुत गर्ने कार्यसूचि बनेको छ । प्रमुख प्रतिपक्षी दल नेपाली कांग्रेसको केन्द्रीय समितिको बैठकले संशोधनका पक्षमा मतदान गर्ने जनाएपछि सरकारले विधेयक अगाडी बढाउने भएको हो । संसद सचिवालयले शनिवार जारी गरेको सम्भावित कार्यसूचिमा संशोधन विधेयक समावेश गरिएको छ । बजेट अघि कानुनमन्त्रीले ‘नेपालको संविधान (दोस्रो संशोधन) विधेयक, २०७७’ लाई प्रस्तुत गर्न अनुमति माग्ने प्रस्ताव पेश गर्नुहुने उल्लेख छ । यसैगरी सोही विधेयक प्रस्ताव पेश गर्ने पनि कार्यसूचिमा उल्लेख छ ।
सरकारले तत्कालै सो विधेयक अगाडी बढाउने चाहेपनि कांग्रेस सभापति शेबरहादुर देउवाले केन्द्रीय समितिको बैठकसम्म पर्खिन आग्रह गरेपछि यसअघि जेठ १४ गते संशोधन विधेयक पेश गर्ने कार्यसूचिबाट हटाइएको थियो । सरकारले जेठ ५ गते नेपालको नयाँ नक्सा ल्याउने निर्णय गरेको थियो । भूमिव्यवस्था, सहकारी तथा गरीबी निवारण मन्त्रालयले लिम्पियाधुरासहित गुञ्जी, नाभी, कुटीलगायत केही भूभाग समेटिएको नेपालको नक्शा (राजनीतिक तथा प्रशासनिक) जेठ ७ गते सार्वजनिक गरिसकेको छ । सो नक्सा अहिले संघीय संसदको लोगोमा समेत प्रयोग भईसकेको छ ।
सोही अनुरुप निशान छापभित्र रहेको नेपालको नक्सा सीमा अनुरुप मिलाउने तयारी स्वरुपम सरकारले संविधान संशोधनको प्रस्ताव जेठ ९ गते संसद्मा दर्ता गरेको छ । संविधान संशोधन प्रस्ताव संविधानको अनुसूची ३ मा रहेको निशान छापभित्रको नक्सा परिवर्तनका निम्ति मात्र संसदमा दर्ता भएको हो । संसदमा सविधान संशोधन गर्न नेकपाको मात्र दुई तिहाई नपुग्ने भएकाले कांग्रेस वा मधेशवादी दलको सहयोग आवश्यक पर्नेछ । सौर्य दैनिक
