काठमाडौँ । निर्वाचन आयोगले राष्ट्रिय प्रजातन्त्र पार्टी (राप्रपा)का पाँच जना नेताहरूमाथि गरिएको कारबाहीबारे सो पार्टीलाई पत्राचार गरेको छ ।
पाँच नेताहरूले आफूहरूलाई अवैधानिक तरिकाले कारबाही गरिएको भन्दै निवेदन दिएपछि आयोगले जवाफ मागेको हो ।
राप्रपा अध्यक्ष राजेन्द्र लिङ्देनले हालै पार्टीको अनुशासन समिति अध्यक्षबाट नवराज सुवेदीलाई हटाएका थिए भने सगुनसुन्दर लावतीलाई प्रवक्ताबाट बर्खास्त गरेका थिए । साथै, उपाध्यक्ष मुकुन्द श्याम गिरीलाई पदमुक्त गरेका लिङदेनले महामन्त्री डा. धवलशम्शेर राणाको संगठन विभाग प्रमुख पद खोसेका थिए भने संयोजित संगठन विभागका सदस्य सचिव धनशुर शाहीलाई पनि पदमुक्त गरेका थिए ।
आफूहरूमाथि विधान विपरीत कारबाही गरेको भन्दै पाँचै जना नेताहरू निर्वाचन आयोग पुगेका थिए । उनीहरूले लिखित निवेदन दिएपछि आयोगले राप्रपामा पत्राचार गरेको हो ।
