एजेन्सी । साउदी अरबका राजकुमार अल वालिद बिन खालिद बिन तलाल अल साउदको शनिबार निधन भयो ।
उनी विगत २० वर्षदेखि कोमामा थिए । उनलाई स्लिपिङ प्रिन्स (सुतिरहने राजकुमार) भनेर चिनिन्थ्यो ।
राजकुमार अल वालिद साउदी शाही परिवारका वरिष्ठ सदस्य राजकुमार खालिद बिन तलालका छोरा र अर्बपति राजकुमार अल वालिद बिन तलालका भतिजा थिए । उनको जन्म अप्रिल १९९० मा भएको थियो ।
२००५ मा, लन्डनमा सैन्य तालिमको क्रममा उनको भयानक सडक दुर्घटना भयो । यस दुर्घटनामा उनको मस्तिष्कमा गम्भीर चोटपटक लाग्यो र आन्तरिक रक्तस्राव भयो । यसपछि उनी कोमामा गए ।
साउदी सरकारले राजकुमारको उपचार गर्न अमेरिका र स्पेनबाट विशेषज्ञ डाक्टरहरूको टोली बोलायो । यद्यपि, उनी कहिल्यै पूर्ण होशमा आएनन् । कहिलेकाहीँ, उनको शरीरमा हलचल हुन्थ्यो, जसले परिवारलाई आशावादी बनायो ।
डाक्टरहरूले उनलाई चिकित्सकीय रूपमा अचेत घोषित गरे । उनका बुबा प्रिन्स खालिदले उपचार रोक्न स्पष्ट रूपमा अस्वीकार गरे ।
यसपछि, उनलाई रियादको दरबारको एउटा विशेष कोठामा राखिएको थियो । यहाँ डाक्टर, नर्स र चिकित्सा सहयोग २४ सै घण्टा उपलब्ध थियो ।
राजकुमार अल वालिदको अवस्थाका भिडियोहरू समय–समयमा बाहिर आउँथे । यसमा उनको हात वा आँखाको पलकको चाल देख्न सकिन्थ्यो । यसले मानिसहरूलाई आशा दियो कि सायद एक दिन उनी होशमा आउनेछन् । सामाजिक सञ्जालमा उनको बारेमा स्लीपिङ प्रिन्स जस्ता ह्यासट्यागहरू ट्रेन्ड हुन्थे ।
