एजेन्सी । भारतको आसामको नलबारी जिल्लाबाट एउटा अनौठो र स्तब्ध पार्ने घटना बाहिर आएको छ ।
यहाँका बासिन्दा मानिक अली नामका एक व्यक्तिले आफ्नी श्रीमतीसँग सम्बन्ध विच्छेद भएकोमा खुशी मनाउन अनौठो तरिका अपनाए । मानिकले ४० लिटर दूधले नुहाएर आफ्नो स्वतन्त्रता मनाए ।
यो सम्पूर्ण घटनाको भिडियो अहिले सामाजिक सञ्जालमा तीव्र गतिमा भाइरल भइरहेको छ ।
भिडियोमा मानिकले बाल्टिन भरिएको दूध लिएर आफूमाथि खन्याउँदै र बारम्बार भन्दै गरेको देख्न सकिन्छ, ‘म आजबाट स्वतन्त्र छु ।’ उनी धेरै खुसी देखिन्छन् र यो अनौठो तरिकाले आफ्नो नयाँ जीवन सुरु गरिरहेको देखिन्छ ।
मानिक अलीले उनकी श्रीमतीको अर्को पुरुषसँग अवैध सम्बन्ध रहेको बताए । उनी पहिले पनि दुई पटक घरबाट निस्किएकी थिइन् । तर मानिकले आफ्नी नाबालिग छोरीको खातिर दुवै पटक उनलाई घर बोलाएका थिए ।
तर, उनी सधैं डराइरहन्थे कि श्रीमती फेरि भाग्न सक्छिन् । त्यसैले मानिकले कानुनी सम्बन्ध विच्छेद गर्ने निर्णय गरे । केही दिन अघि, उनले अदालतबाट सम्बन्ध विच्छेदको स्वीकृति पाए, त्यसपछि उनले यो उत्सव मनाए ।
