काठमाडौँ । शुभांशु शुक्ला सहित चार अन्तरिक्ष यात्री १८ दिन अन्तरिक्ष स्टेशनमा बसेर पृथ्वीमा फर्किएका छन् ।
लगभग २३ घण्टाको यात्रापछि, ड्र्यागन अन्तरिक्ष यान आज अर्थात् जुलाई १५ मा दिउँसो सवा ३ बजे क्यालिफोर्नियाको तटमा अवतरण गरेको छ । यसलाई स्प्लासडाउन भनिन्छ ।
चारै जना अन्तरिक्ष यात्रीहरू एक दिन अगाडि अर्थात् सोमबार साँझ ५ बजे अन्तर्राष्ट्रिय अन्तरिक्ष स्टेशनबाट पृथ्वीको लागि प्रस्थान गरेका थिए ।
सबै अन्तरिक्ष यात्रीहरू जुन २६ मा नेपाली समय अनुसार सवा ४ बजे आईएसएसमा पुगेका थिए ।
उनीहरु जुन २५ मा दिउँसो सवा १२ बजे एक्सियम मिसन ४ अन्तर्गत प्रस्थान गरे । उनीहरुले स्पेसएक्सको फाल्कन–९ रकेटमा जोडिएको ड्र्यागन क्याप्सुलमा केनेडी स्पेस सेन्टरबाट उडान भरेका थिए ।
शुभांशुको फिर्ताको बारेमा भारतीय प्रधानमन्त्री नरेन्द्र मोदीले भने – ‘सम्पूर्ण राष्ट्रसँगै, म समूह क्याप्टेन शुभांशु शुक्लाको ऐतिहासिक अन्तरिक्ष यात्राबाट पृथ्वीमा फिर्ता स्वागत गर्दछु । शुभांशुले आफ्नो समर्पण, साहसले अरबौं सपनाहरूलाई प्रेरणा दिएका छन् । यो हाम्रो आफ्नै मानव अन्तरिक्ष उडान अभियान गगनयान तर्फको अर्को कोसेढुङ्गा हो ।’
शुभांशु अगस्ट १७ सम्ममा भारत फर्कन सक्छन् । अन्तरिक्ष यात्रीहरूले अवतरणपछि सामान्यतया सात दिनको चिकित्सा जाँच र पुनर्वासको लागि समय लिन्छन्, ताकि उनीहरू फेरि पृथ्वीको गुरुत्वाकर्षणमा समायोजन हुन सकून् । यसपछि मात्र शुभांशु भारत फर्कनेछन् ।
