पोखरा। पोखराको छोरेपाटन माध्यमिक विद्यालयमा उत्पन्न विवादपछि विद्यालय व्यवस्थापन समिति अध्यक्षमाथि मोसो दलिएको घटनामा संलग्न तीन जना युवा पक्राउ परेका छन्।
कास्की प्रहरीले घटनालाई योजनाबद्ध रूपमा अघि बढाइएको निष्कर्ष निकाल्दै तीन अभियुक्तलाई नियन्त्रणमा लिएको हो। पक्राउ पर्नेहरूमा नेकपा बहुमतका व्युरो केन्द्रिय सदस्य सुजन आयम उर्फ लोकेन्द्र विश्वकर्मा, नेपाल क्रान्तिकारी विद्यार्थी संघ गण्डकी प्रदेश संयोजक राजन साउद, र कास्की संयोजक वासुदेव बुढा रहेका छन्।
उनीहरूमाथि सार्वजनिक स्वार्थ, स्वास्थ्य, सुरक्षा र नैतिकताविरुद्धको कार्य मानेर अभद्र व्यवहारसम्बन्धी मुद्दा दर्ता गरिएको छ। अनुसन्धानलाई अगाडि बढाउन अदालतबाट १० दिनको म्याद थप गरिएको कास्की प्रहरीले जनाएको छ।
साथै, प्रहरीले घटनासँग जोडिएका विभिन्न सहयोग संकलन रसिदको अर्धकट्टी समेत बरामद गरेको छ, जसले घटना योजनाबद्ध रूपमा भएको आशंका थप बलियो बनाएको छ।
