काठमाडौं। स्कटल्यान्ड सन् २०२६ मा आयोजना हुने आइसिसी टी–२० विश्वकप क्रिकेटका लागि छनोट हुन असफल भएको छ। युरोप छनोट अन्तर्गत शुक्रबार सम्पन्न अन्तिम खेलमा स्कटल्यान्ड जर्सीसँग एक विकेटले पराजित हुँदै प्रतियोगिताबाट बाहिरिएको हो।
टी–२० वरियतामा १३औं स्थानमा रहेको स्कटल्यान्डले प्रतियोगितामा कुल एक खेल मात्र जितेको थियो। तुलनात्मक रूपमा २७औं स्थानमा रहेको जर्सीले स्कटल्यान्डलाई हराउँदै प्रभावशाली प्रदर्शन गर्दै दोस्रो स्थानमा उक्लिएको छ।
युरोप क्षेत्रीय छनोटबाट शीर्ष दुई टोलीले विश्वकपमा स्थान बनाउने छन्। इटाली ५ अंकसहित शीर्ष स्थानमा रहँदा, सबै खेल समाप्त गरिसकेको जर्सी ५ अंकसहित दोस्रो स्थानमा छ। यद्यपि, इटालीले एक खेल खेल्न बाँकी छ, जसले अन्तिम स्थान निर्धारण गर्नेछ।
स्कटल्यान्डको पराजयले क्रिकेट विश्लेषकलाई समेत चकित बनाएको छ, किनभने टी–२० रैंकिङमा उनीहरूको स्थान बलियो मानिन्छ। यो नतिजाले अपेक्षाभन्दा कमजोर प्रदर्शनका कारण स्कटल्यान्डको विश्वकप सपना अधुरो बनाएको छ।
