काठमाडौं । राष्ट्रिय प्रजातन्त्र पार्टीका सासद राजेन्द्र लिङदेनले भारतले सुगौली सन्धि नमान्ने हो भने टिष्टा र काँगडासम्मको भूमिका दाबी गर्नु पर्ने बताउनु भएको छ । प्रतिनिधिसभामा संविधान संशोधन सम्बन्धी छलफलमा भाग लिँदै सांसद लिङदेनले नेपालको भूमि आफ्नो नक्सामा समेटेको भारतले नेपाललाई निःशर्त रुपमा भूमि फिर्ता गर्नु पर्ने बताउनुभयो ।
उहाँले नेपाल भारतकाे भाइ नभएकाले नेपाललाइ असल छिमेकी र मित्रको रुपमा व्यवहार गर्न पनि आग्रह गर्नुभयो । सांसद लिङदेनले संविधानको प्रस्तावनामा नै गम्भीर असहमति रहँदा रहँदै पनि यो प्रस्तावलाई निःशर्त समर्थन गरेको जानकारी गराउनुभयो ।
सारा नेपालीको खुसीको दिन भएको स्मरण गर्दै उहाँले यो ऐतिहासिक दिनको नेतृत्व गर्ने प्रधानमन्त्री ओली सहित सबैलाई बधाई समेत दिनु भयो । सांसद लिङदेनले पूर्व वक्ता एवं नेकपा सांसद पुष्पकमल दाहालको भनाई प्रति रोष्ट्रमबाटै असहमति जनाउँदै निराधार आरोप नलगाउन आग्रह समेत गर्नुभयो ।