काठमाडौँ । म्याग्दी जिल्लाको धौलागिरि गाउँपालिका क्षेत्रमा पहिरो खस्दा म्याग्दी नदी केही समयका लागि अवरुद्ध बन्न पुगेको छ ।
गाउँपालिकाको वडा नम्बर ४ र ६ जोड्ने बाँसबोट भीरबाट खसेको पहिरोका कारण नदी थुनिएको हो ।
गएरातिदेखि परेको लगातार वर्षाका कारण पहिरो खसेर करिब १५ मिनेटसम्म नदीको बहाव रोकिएको थियो ।
त्यसपछि नदी पुनः बग्न थालेको प्रहरीले जनाएको छ । नदी थुनिएपछि ‘ओभरफ्लो’ भएर बग्न थालेकाले तटीय क्षेत्रमा डुबानको सम्भावना रहेको बताइएको छ ।
तटीय क्षेत्रका बस्तीहरू छहरी, कल्लेनी, भारवाङ, साँवता, थापाचौर, दरवाङ, छिसवाङ, खोप्टी, पिपलबोट, बाबियाचौर, तोराखेत, सिमलचौर, तातोपानी, सिंगा र बेनी बजार लगायतका स्थानमा सतर्कता अपनाउन अनुरोध गरिएको छ ।
