काठमाडौं। राजधानीको झोंछे क्षेत्रस्थित एक होटलमा लागू औषध कोकिन जस्तो देखिने पदार्थको कारोबार भइरहेको सूचनाको आधारमा प्रहरीको विशेष टोलीले छापा मारी पाँच जनालाई नियन्त्रणमा लिएको छ।

पक्राउ परेका व्यक्तिहरूको साथबाट ठूलो मात्रामा लागू औषध, नगद रकम, स्कुटर, मोबाइललगायतका सामग्री बरामद गरिएको छ। असार २० गते राति करिब २:२० बजे मालिगाउँ प्रहरी वृत्तबाट खटिएको टोलीले काठमाडौं महानगरपालिका–२० स्थित ‘इन होटल’ को तेस्रो तल्लाबाट उनीहरूलाई नियन्त्रणमा लिएको हो।

पक्राउ परेकाहरूमाथि जिल्ला अदालत काठमाडौंबाट १० दिनको म्याद थप गरी थप अनुसन्धान भइरहेको प्रहरीले जनाएको छ।

पक्राउ परेका दर्शन सापकोटा, २१ वर्ष, बुढानिलकण्ठ नगरपालिका–११ काठमाडौं, सन्देश बहादुर भट्ट १९ वर्ष गोकर्णेश्वर नगरपालिका–४, हाल बसन्तबारी होटल काठमाडौं–४, आयुष श्रेष्ठ २६ वर्ष इन्द्रावती गाउँपालिका–२ सिन्धुपाल्चोक, हाल बाफल, काठमाडौं–६, प्रकाश यादव २२ वर्ष विष्णुपुर गाउँपालिका–८ सर्लाही हाल झमेलो ललितपुर–१ र सुजन अधिकारी ३८ वर्ष ललितपुर महानगरपालिका–४ हाल बालुवाटार काठमाडौं–४ बाट कोकिन जस्तो देखिने लागू औषध – ६५.१३ ग्राम, LSD जस्तो देखिने लागू औषध – ३ थान, विभिन्न कम्पनीका मोबाइल – ५ थान, इलेक्ट्रोनिक तराजु – १ थान, Vespa स्कुटर – १ थान , नेपाली नगद – रु २,११,००० (अक्षरेपी दुई लाख एघार हजार) र  लागू औषध प्याक गर्न प्रयोग हुने प्लास्टिक खोलहरुसहित पक्राउ गरेको हो ।