काठमाडाैंः नेपाल ललितकला प्रज्ञा–प्रतिष्ठान (नाफा)ले कलाकार शङ्करनाथ रिमाल र सन्तकुमार शाक्यलाई यसपालिको राष्ट्रिय अरनिको सम्मान प्रदान गर्ने भएको छ ।
नाफाले आज विज्ञप्ति जारी गरी रिमाल र शाक्यलाई उक्त पुरस्कार प्रदान गर्ने घोषणा गरेको हो । पुरस्कारको राशि जनही रु एक लाख रहेको छ । नाफाले रु २५ हजार राशि रहेको ‘ललितकला राष्ट्रिय लेखन पुरस्कार’ प्रा डा लय मैनाली र ‘ललितकला राष्ट्रिय पत्रकारिता पुरस्कार’ केशवराज खनाललाई प्रदान गर्ने निर्णय गरेको छ ।
गत वैशाख २ गते ललितकला प्रदर्शनीका क्रममा वितरण गर्ने भनिएको उक्त पुरस्कार कोभिड–१९ का कारण रोकिँदै आएको थियो । प्रदर्शनीलाई अब वैकल्पिक (भर्चुअल) माध्यमबाट गर्ने तयारी भइरहेको छ ।
प्रदर्शनीका लागि सङ्कलित कलाकृतिको मूल्याङ्कन गरी अन्य विभिन्न विधामा समेत पुरस्कार घोषणा गरिएको नाफाका कुलपति कान्छाकुमार कर्माचार्यले जानकारी दिनुभयो । उहाँका अनुसार विधागतरुपमा पुरस्कार प्राप्त गर्ने कलाकारको नामावलीसमेत सार्वजनिक गरिएको छ ।
राष्ट्रिय ललितकला पुरस्कारअन्तर्गत हस्तकलातर्फ कास्कीका मिलन शेरचन, मूर्तिकलातर्फ ललितपुरका सुरेश तुलाधर, आधुनिक मूर्तिकलातर्फ भक्तपुरका भूषण दुवाल, परम्परागत चित्रकलातर्फ भक्तपुरका कृष्णराम घेमेसु, आधुनिक चित्रकलातर्फ पर्वतका गणेश जिसी, लोककलातर्फ धनुषाका लक्ष्मण मण्डल र वास्तुकला तथा सिर्जनात्मक कलातर्फ काठमाडौँका प्रमिला लामा रहनुभएको छ ।
उक्त पुरस्कारको राशि जनही रु ६० हजार प्रदान गरिनेछ ।
अन्य १५ जनालाई रु २५ हजार राशिको ललितकला विशेष पुरस्कार प्रदान गर्ने घोषणासमेत गरिएको कर्माचार्यले जानकारी दिनुभयो ।
यस्तै प्रादेशिक पुरस्कारअन्तर्गत प्रदेश नं १ बाट मोरङका कौशिला राई, प्रदेश नं २ बाट सप्तरीका रुविकुमार कर्ण, वाग्मती प्रदेशबाट काठमाडौँका प्रकाश मिजार, गण्डकी प्रदेशमबाट कास्कीका दलबहादुर गुरुङ, प्रदेश नं ५ बाट रुकुमका आकाश बुढा मगर, कर्णाली प्रदेशबाट मुगुका मीनबहादुर नेपाली र सुदूरपश्चिम प्रदेशबाट कैलालीका गणेशदेवी चौधरीलाई पुरस्कार प्रदान गरिने भएको छ ।
