काठमाडौँ । एएफसी महिला एसियन कप छनोट अन्तर्गत शनिबार हुने नेपाल र उज्बेकिस्तानबीचको खेल निर्णायक हुने भएको छ ।
समूह एफमा समान दुई–दुई खेल जितेका दुबै टोलिलाई एसियन कप पुग्न एक–अर्काविरुद्ध स्पष्ट जित निकाल्नुपर्ने हुन्छ ।
दुबैको समान ६ अंक छ । यी दुई टोलीबीच समूह विजेता बन्दै अर्को वर्ष अष्ट्रेलियामा हुने महिला एसियन कपमा छनोट हुन जितको विकल्प छैन ।
दुई खेल हारेको लाओस र श्रीलंका बाहिरिसकेका छन् । नेपाल र उज्बेकिस्तान दुवैले कुनै पनि गोल नखाई लाओस र श्रीलंकालाई हराए ।
नेपालले पहिलो खेलमा लाओसलाई ९–० ले हराएको थियो भने दोस्रो खेलमा श्रीलंकालाई ८–० ले पराजित गर्यो ।
अर्कोतर्फ पहिलो खेलमा श्रीलंकालाई १० गोलको फराकिलो जित निकालेको उज्बेकिस्तानले दोस्रो खेलमा लाओसलाई ७–० ले हरायो । यसरी दुबै टोलिको समान अंकमात्रै नभई गोलडिफरेन्स पनि बराबर छ । तसर्थ, एसियन कपमा पुग्नका लागि यो खेल दुबै टोलिका लागि फाइनल जस्तै बन्नेछ ।
नयाँ कप्तान पाएको नेपालले सावित्रा भण्डारी र नयाँ प्रशिक्षक प्याट्रिक डि वाइल्डको नेतृत्वको सुरुवाती दुई खेलमा सानदार प्रदर्शन गर्यो । अब त्यो लय समूहको अन्तिम खेलमा पनि कायम राख्नुपर्ने नेपाललाई चुनौति छ ।
यदि नेपाल र उज्बेकिस्तानबीच समूह चरणको अन्तिम खेल बराबरीमा सकिएमा खेल पेनाल्टी सुटआउटमा जानेछ । नेपाल र उज्बेकिस्तानबीचको खेल बराबरी भएमा हेड टु हेड, गोल अन्तर सबैमा बराबर नै हुने भएकाले खेल टाईब्रेकरमा जाने भएको हो ।
प्रतियोगिताको नियमावली अनुसार समूहको अन्तिम खेल समेत भएकोले यदि खेल बराबरी भएमा सिधै पेनाल्टीसुटआउट हुनेछ ।
तर, अन्तिम खेल बराबरी नभएर कुनै टोलीले स्पष्ट नतिजा निकालेमा उक्त टोली नै समूह विजेता बनेर महिला एसियन कपमा छनोट हुनेछ ।
नेपालले अहिलेसम्म उज्बेकिस्तानलाई हराउन सकेको छैन । अहिलेसम्म नेपाल र उज्वेकिस्तानबीच तीन खेल भएको छ । जसमा नेपालले तिनै खेलमा पराजय ब्यहोरेको छ ।
सन् १९९९ मा फिलिपिन्समा भएको महिला एसियन कपमा नेपालले पहिलो पटक उज्बेकिस्तानको सामना गरेको थियो । उक्त खेलमा नेपाल ६–१ ले पराजित भयो । एकमात्र गोल गर्न सफल नेपालका लागि उक्त गोल ऐतिहासिक बन्यो ।
किनभने नेपालका लागि पेमा डोल्मा लामाले उज्बेकिस्तानविरुद्ध गरेको उक्त गोल नै नेपाली महिला फुटबलमा पहिलो अन्तर्राष्ट्रिय गोल थियो ।
त्यसपछि नेपालले सन् २०१९ मा उज्बेकिस्तानसँग दुई खेल खेल्दा दुवैमा पराजित भएको थियो । कीर्गिस्तानमा नादेज्दा कपमा नेपालले दुई खेल खेलेको थियो ।
नेपालले समूह चरणमा २–० ले पराजय ब्यहोर्दा फाइनल ३–२ गोलले गुमायो । यसरी तीन खेलमा उज्बेकिस्तानले ११ गोल गर्दा नेपालले जम्मा ३ गोल मात्रै गरेको छ ।
उज्बेकिस्तानलाई घरेलु मैदान र समर्थकको भरपुर साथ मिल्नेछ । यता, नेपाल पनि उज्बेकिस्तानलाई उसकै घरेलु मैदानमा हराउँदै एसियन कपमा पुग्ने लक्ष्यका साथ मैदानमा उत्रनेछ ।
