काठमाडौं । नेपालको नयाँ पदमार्ग चिनाउने पहल गर्दै निर्माण गरिएको ‘जिरो टु ८८४८’ नामक डकुमेन्ट्रीको ट्रेलर सार्वजनिक गरिएको छ ।
नेपालको सबैभन्दा होचो ठाउँ झापाको कचनकवलदेखि सर्वोच्च शिखर सगरमाथासम्मको पदमार्ग प्रवद्र्धन गर्ने उद्देश्यले यो डकुमेन्ट्री निर्माण गरिएको हो ।
समुन्द्री सतहबाट ५८ मिटर उचाइमा रहेको कचनकवलदेखि ८८४८ मिटर उचाईको सगरमाथा चुचुरोसम्म ९० दिन लगाएर तयार पारिएको यो डकुमेन्ट्रीले नयाँ पदमार्गबारे संसारलाई जानकारी दिने बताइएको छ ।
अभियानका अगुवा प्रेम बानियाँले ‘जिरो टु ८८४८’ नाम तय गरिएको ५१० किलोमिटर लामो उक्त रुटले नयाँ पदमार्गबारे चिनाउने, विश्वब्यापी तापक्रम वृद्धिबारे सचेतना दिने र भौगोलिक पर्यटनको प्रवर्धन गर्ने बताए ।
नीराजन पाण्डे र बलराम पाण्डे निर्देशित यो डकुमेन्ट्री अगस्टमा अमेरिकी हलबाट रिलिज हुनेछ । हल रिलिजको एकसातापछि कुनै एक ओटीटी प्लाटफर्ममा रिलिज गर्ने तयारी छ । नेपालमा भने सन् २०२६ को जनवरीमा प्रदर्शन गरिने भएको छ ।
यो डकुमेन्ट्रीमा १८ पटक सगरमाथा चढेका टेन्डी शेर्पादेखि विश्व साइकलयात्री पुष्कर शाहसम्म जोडिएका छन् ।
यो डकुमेन्ट्रीमा चर्चित हलिउड फिल्ममेकर तथा पर्वतारोही कोनराड एन्कर पनि जोडिएका छन् । उनी फिल्ममा प्रशिक्षकको रोलमा छन् ।
बृतचित्रको सम्पादन, छायांकन तथा निर्देशन निरन्जन पाण्डे र बलराम बुढाथोकीले गरेका हुन् । उमंग शाही यसको सहायक छायाकार हुन् । श्री वाग्ले कार्यकारी निर्माता हुन् । प्रोडक्सन टिममा कपिलशरण वाग्ले, राजेन्द्र पाण्डे, लक्ष्मण पराजुली र जयनारायण शाह छन् ।
