काठमाडौंः नेपाल आयल निगमको कार्यकारी निर्देशकका लागि सरकारले विज्ञापन प्रकाशन गरेको छ । तत्कालीन कार्यकारी निर्देशक सुरेन्द्र पौडेलको तीन वर्षे कार्यकाल सकिएसँगै उद्योग, वाणिज्य तथा आपूर्ति मन्त्रालयले विज्ञापन गरेको हो ।
मन्त्रालयको कार्यकारी निर्देशकका लागि गठित छनौट तथा सिफारिस समितिले आइतबार सूचना जारी गर्दै आवेदन खुलाएको हो ।
पौडेल २०७५ सालमा कार्यकारी निर्देशकमा नियुक्त भएका थिए । उनी २२ पुसमा निगमबाट बिदा भएका थिए ।
निगमको कार्यकारी निर्देशक हुन निगमको कार्य प्रकृतिसँग सम्बन्धित विषय वा प्रशासन, व्यवस्थापन, अर्थशास्त्र, इन्जिनियरिङ वा कानुन विषयमा कम्तीमा स्नातकोत्तर तह उत्तीर्ण गरेको र व्यवस्थापकीय जिम्मेवारीको पदमा कम्तिमा पाँच वर्षको अनुभव भएको हुनुपर्ने योग्यता तोकिएको छ ।
पूर्व कार्यकारी निर्देशक पौडेलको कार्यकालमा निगमले भौतिक पूर्वाधार निर्माण र निगमलाई अटोमेसनमा लैजान महत्वपूर्ण कार्य गर्नुका साथै नेपाल भारत तेल पाइपलाइनहरु संचालनमा आएका थिए भने केही पाइपलाइनहरु बिछ्याउन सम्झौता एवं विस्तृत परियोजना डिजाइनका कार्य भएका थिए ।
पौडेलको कार्यकालमा निगम केही समय नाफामा गए पनि हाल अन्तर्राष्ट्रिय जगतमै कच्चा तेलको मूल्यवृद्धि भएपछि निगम घाटामा गइरहेको र पटकपटक इन्धनको मूल्यवृद्धि भएको थियो ।
