काठमाडौं । राष्ट्रिय स्वतन्त्र पार्टीले सभापति रवि लामिछानेको मुद्दामा संलग्न कानुन व्यवसायीको उपस्थितिमा ‘केस ब्रिफिङ’ गरेको छ ।
पार्टी कार्यालय वनस्थलीमा हिजो आयोजित कार्यक्रममा रास्वपाले सभापति लामिछानेको मुद्दामा केस ब्रिफिङ गरेको हो । केस ब्रिफिङमा वरिष्ठ अधिवक्ताहरू सुशीलकुमार पन्त, रमण श्रेष्ठ, मेघराज पोखरेल, सुरेन्द्र थापासहित अधिवक्ताहरू दीपेन्द्र झा, नारायणदत्त कँडेल, राजेन्द्र सेढाईं, सुदीज्ञ पन्त, सञ्जल गोलेलगायत थिए ।
अधिवक्ता सुदीज्ञ पन्तले सभापित लामिछानेलाई लगाइएका अभियोगबारे समष्टिगत विवरण पेस गरेका थिए । त्यसमा अधिवक्ताहरूले ब्रिफिङ गरेका थिए ।
वरिष्ठ अधिवक्ता सुशीलकुमार पन्तले लामिछानेलाई संसदीय छानबिन विशेष समितिको प्रतिवेदनको निष्कर्षविपरीत मुद्दा लगाइएको बताए ।
यस्तै अर्का वरिष्ठ अधिवक्ता सुरेन्द्र थापाले मुद्दा लगाइएका सहकारीमा लामिछाने सुरुदेखि नै सम्बद्ध रहेर ठगी गरे भन्ने भाष्य स्थापित गराउन खोजिएको बताए ।
