काठमाडौँ । अमेरिकाले नेपाली नागरिकलाई भिसा दिनुअघिको प्रक्रियामा झन् कडाइ गरेको छ ।
भिजिट भिसामा जानेबाट लाखौँ रूपैयाँ अवैध रुपैयाँ असुल्ने गर्ने गरिएको विवरण सार्वजनिक भएसँगै अमेरिकाले नेपालबाट जानेहरूका लागि भिसा दिन झन् कडाइ गरेको हो ।
काठमाडौंस्थित अमेरिकी दूतावासले बुधबार एक सूचना जारी गर्दै कडाइका साथ गरिने सुरक्षा जाँचबिना भिसा दिन नसकिने जनाएको छ ।
दूतावासले राष्ट्रिय सुरक्षामा सम्भावित खतरा पुर्याउन सक्ने व्यक्तिहरूलाई अमेरिका यात्रामा प्रतिबन्ध लगाइने पनि जानकारी गराएको छ ।
‘प्रत्येक यात्रुले कडा सुरक्षा जाँच प्रक्रियाबाट गुज्रनुपर्छ, जसमा कानुन कार्यान्वयन निकायका रेकर्ड र आतंकवादविरोधी डाटाबेसहरूमा नाम जाँच पनि समावेश हुन्छन्,’ दूतावासले सूचनामा भनेको छ, ‘सबै सुरक्षा जाँचहरू पूर्ण रूपमा पूरा भएर सम्भावित आशंकाहरू निवारण नभएसम्म तपाईंको भिसा जारी हुने छैन ।’
यस्तै, दूतावासले अमेरिकाको राष्ट्रिय सुरक्षा आफूहरूको उच्च प्राथमिकता रहेको जनाउँदै अमेरिकातर्फको यात्रामा प्रतिबन्ध लगाउनु अमेरिकी नागरिकहरूको सुरक्षा सुनिश्चित गर्ने मुख्य उपाय रहेको उल्लेख गरेको छ । ‘राष्ट्रिय सुरक्षामा सम्भावित खतरा पुर्याउन सक्ने व्यक्तिहरूलाई अमेरिकातर्फको यात्रामा प्रतिबन्ध लगाउनु अमेरिकी नागरिकहरूको सुरक्षा सुनिश्चित गर्ने मुख्य उपाय हो’, दूतावासले अगाडि भनेको छ ।
त्रिभुवन विमानस्थल अध्यागमन कार्यालयका प्रमुख तीर्थराज भट्टराईसहितको मिलेमतोमा भिजिट भिसामा जानेबाट दैनिक ५० लाखभन्दा बढी रुपैयाँ उठाउने गरेको प्रकरणमा अहिले अख्तियार दुरुपयोग अनुसन्धान आयोगले छानबिन गरिरहेको छ ।
उक्त प्रकरणमा गृहमन्त्री रमेश लेखकका सचिवालयकै सदस्यहरूसमेत लेनदेनमा मुछिएको जानकारी सार्वजनिक भएको छ ।
