काठमाडौंः अख्तियार दुरुपयोग अनुसन्धान आयोगले नेपाल बैंक लिमिटेड, डिल्लीबजार शाखाका तत्कालीन शाखा प्रबन्धक हाल निलम्बित कर्मचारी भुपराज कोइरालाले बैंकको सिस्टम ह्रयाक गर्ने, बैंकमा जम्मा गर्नुपर्ने व्याज आफ्नो निजी खातामा जम्मा गर्ने लगायतका कार्यहरु गरी भ्रष्टाचारजन्य कार्य गरेको भन्दै विशेष अदालतमा आइतबार मुद्दा दायर गरेको छ ।
आयोगका प्रवक्ता प्रदीपकुमार कोइरालाका अनुसार आयोगले गरेको अनुसन्धानमा बैंकको काठमाडौं बैकिङ अफिस र डिल्लीबजार शाखामा कार्यरत रहँदा बैकिङ्ग सिष्टमअन्तर्गत प्रयोग गर्ने गरी निजलाई व्यक्तिगत रुपमा प्रदान गरिएको अरु कसैले प्रयोग गर्न नमिल्ने र अरुलाईसमेत प्रयोग गर्न दिन नमिल्ने व्यक्तिगत टेलर आईडी र System Super User बिद्युतीय माध्यमको दुरुपयोग गरेको खुलेको थियो ।
उक्त कार्यबाट बैंकलाई हानिनोक्सानी पुर्याउने उद्देश्यले काठमाडौं बैंकिङ अफिस र डिल्लीबजार शाखामा रहेका हिसाब अनधिकृत रुपमा खर्च गरी रु. ५४ लाख ८४ हजार आफ्ना विभिन्न खातामा जम्मा गरेको आयोगले जनाएको छ ।
निज कोइरालालाई बिगो रु. ५४ लाख ८४ हजार कायम गरी भ्रष्टाचार निवारण ऐन, २०५९ को दफा १७ मा उल्लेख भएबमोजिम सजाय हुन तथा हानिनोक्सानी गरी खाइमासेको बिगो रकम असुल उपर गर्न विशेष अदालत, काठमाडौंमा आरोप पत्र दायर गरिएको आयोगले जनाएको छ ।
