काठमाडौँ । दुई दिन यतादेखि लगातार रुपमा भएको वर्षाका कारण आएको बाढीमा र पहिरोमा परी म्याग्दीमा कम्तीमा पनि ३ जनाको मृत्यु भएको छ । त्यसैगरी त्यहाँबाट प्राप्त भएको समाचारमा थप ३१ जना व्यक्ति बेपत्ता भएका बताइएको छ । म्याग्दी जिल्लाको धौलागिरि गाउँपालिका– ७ ताकममा बाढीले बगाएपछि २ जना र रघुगंगा गाउँपालिकामा १ जनाको शव भेटिएको छ । म्याग्दीका प्रहरी प्रमुख डीएसपी किरणजंग कुँवरले बाढी र पहिरोले ठूलो क्षति भएको जानकारी दिएका छन् ।
त्यस्तै रघुगंगा गाउँपालिका– ६ मा बाढीले बगाएर बेपत्ता भएका एक स्थानीयको शव भेटिएको प्रहरीले जनाएको छ । यहाँ अविरल रुपमा परेको पानीका कारण आएको पहिरोबाट धौलागिरि, रघुगंगा र मालिका गाउँपालिका बढी प्रभावित भएको छ । धौलागिरि गाउँपालिका –६ का २३ जना र मालिका गाउँपालिका–७ बिमका ८ जना वेपत्ता भएका प्रमुख जिल्ला अधिकारी ज्ञानप्रसाद ढकालले जानकारी दिए । पहिरो प्रभावित क्षेत्रमा उद्धार टोली पुगेको प्रजिअ ढकालले जानकारी दिए । ‘रघुगंगामा पुलै बगाएको छ । पहिरो छिचोल्दै जान पनि कठिन भइरहेको छ’ उनले भने ।
उद्धारका लागि उद्धारकर्मी पु¥याउन गृह मन्त्रालयबाट हेलिकप्टर माग गरिएको पनि उनले बताए । पहिरोमा बेपत्ताहरुको खोजी र उद्धारमा समस्या भएकाले गृह मन्त्रालयमार्फत हेलिकप्टर मगाइएको र हेलिकप्टरमार्फत र पैदल गरी उद्धार टोली घटनास्थलमा पुगेपछि मात्र घटनाको यथार्थ आउने जिल्ला प्रहरी कार्यालयले जनाएको छ । रघुगंगा गाउँपालिकामा रघुगंगा खोलाले पुल बगाएको छ । बेलिब्रिज बगाएपछि रघुगंगा, अन्नपूर्ण गाउँपालिका र मुस्ताङ जिल्लासम्मको यातायात सम्पर्क बन्द भएको छ ।
