काठमाडौं। आईसीसी महिला टी-२० विश्वकपको एसिया छनोट पार गर्दै पहिलोपटक ग्लोबल छनोटमा पुगेको नेपाली महिला क्रिकेट टोली बुधबार साँझ स्वदेश फर्किएको छ।
त्रिभुवन विमानस्थलमा क्यान सचिव पारस खड्का, प्रवक्ता छुम्बी लामा लगायतले टोलीलाई स्वागत गरे। कप्तान इन्दु बर्मा र पूर्वकप्तान रुबिना क्षेत्रीले यो उपलब्धिलाई ऐतिहासिक भन्दै आगामी दिनमा अझ कडा मेहनत गर्नुपर्ने बताए।
नेपालले सोमबार युएईलाई हराएर ग्लोबल छनोटमा स्थान बनाएको थियो। समूह चरणमा बहराइनलाई दुईपटक हराए पनि हङकङसँग पराजित भएको नेपाल सुपर ३ मा पुगेको थियो। सुपर ३ मा युएईलाई हराउँदै थाइल्याण्डसँग पराजित भएको नेपाल एसिया छनोटको उपविजेता बनेको हो।
