काठमाडौँ । सउदी अरबको मक्का–मदिना हज यात्रा गर्न लागेका हज यात्रीहरूलाई रोग प्रतिरोधात्मक खोप प्रदान गरिएको छ ।
बिहीवार काठमाडौंस्थित पञ्चकाश्मिरी मस्जिदमा हज यात्रीहरुलाई रोग प्रतिरोधात्मक खोप प्रदान गरिएको हो । कार्यक्रममा बोल्दै स्वास्थ्य तथा जनसंख्यामन्त्री प्रदीप पौडेलले विगत वर्षहरुभन्दा यस वर्षको हज यात्रालाई व्यवस्थित बनाउने प्रयास गरेको बताउनु भयो । उहाँले मक्कामा हज गर्न जानु मुस्लिम समुदायको परम्परा रहेको उल्लेख गर्दै हज यात्रालाई थप व्यवस्थित गर्न सरकार प्रतिवद्ध रहेको बताउनु भयो । उहाँले हज गर्न जान लागेका यात्रीहरुलाई शुभकामना समेत व्यक्त गर्नुभयो ।
उहाँले भन्नुभयो, ‘नेपाली मुस्लिम समुदायको परम्परागत विषय हो । यसलाई व्यवस्थित गर्ने हामीले प्रयत्न गरेका छौं । अहिले हज यात्रामा एक हजारभन्दा धेरै जना मक्कामदिना जाँदै हुुनुहुन्छ । तपाईहरु सबैलाई शुभकामना समेत दिन चाहन्छु । अगामी वर्षहरुमा यसलाई अझै धेरै व्यवस्थित गर्ने कार्य गर्नेछौं ।’
नेपाल हज यात्र समितिका अध्यक्ष इश्रा मुल्ला मियाँले नेपालमा हज हाउस निर्माण गरिदिन सरकारसँग माग गर्नुभयो । उहाँले नेपालमा हज हाउस नभएकै कारण कस्मिरी मस्जिदमा बस्न बाध्य भएको बताउनु भयो । उहाँले अहिले पनि कस्मिरी मस्जिदमा बस्ने व्यवस्था नभए नेपाली हज यात्रीहरु अलपत्र पर्ने अवस्था रहेको उल्लेख गर्दै हज हाउसको व्यवस्थाका लागि पहल गरिदिन स्वास्थ्यमन्त्री पौडेलसँग आग्रह गर्नुभयो ।
उहाँले भन्नुभयो, ‘नेपालमा एउटा हज हाउस नभएको कारणले गर्दा हामी कस्मिरी मस्जिदमा बस्न बाध्य छौं । यदि कस्मिरी मस्जिद हुन्थेन भने नेपाली हज यात्रीहरु बाटोमै अलपत्र पर्ने अवस्था पनि मैले देखेको छु । अहिलेको सरकारले एउटा हज हाउसको लागि व्यवस्था गरिदियोस् भन्ने आग्रह पनि गर्न चाहन्छु ।’
यसपटक नेपालबाट साउदी अरबस्थित मक्कामा हज गर्न एक हजार एक सय ७० जना जाँदै हुनुहुन्छ ।
