काठमाडौँ। नेपाल कम्युनिष्ट पार्टी (माओवादी केन्द्र)की नेतृ रेखा शर्माले राष्ट्रसेवक कर्मचारीले सार्वजनिक सेवा प्रवाहलाई उच्च प्राथमिकतामा राखेर कार्यसम्पादन गर्नुपर्ने बताउनुभएको छ ।
नेपाल राष्ट्रिय कर्मचारी सङ्गठन, संस्थान राष्ट्रिय समितिको तेस्रो अधिवेशनको आज यहाँ उद्घाटन गर्दै उहाँले जनताको मन जित्नेगरी काम गर्न सुझाव दिनुभयो । “सङ्गठनमा आबद्ध सम्पूर्ण कर्मचारीले आ–आफ्नो स्थानबाट उत्कृष्ट कार्यसम्पादन गरेर उदाहरण प्रस्तुत गर्न सक्नुपर्छ”, शर्माले भन्नुभयो ।
नेपाल राष्ट्रिय कर्मचारी महासङ्घका अध्यक्ष मणिरत्न शाक्यले सेवा प्रवाहमा सहजीकरणसँगै कर्मचारीको हितलाई संगठन उचित महत्व दिँदै आएको बताउनुभयो । संस्थान राष्ट्रिय समितिका अध्यक्ष जयबहादुर शाही, वरिष्ठ उपाध्यक्ष तिलकजङ्ग बुढाथोकीलगायतले राष्ट्रसेवकलाई प्रोत्साहित हुने नीति तथा योजना ल्याउन सरकारलाई सुझाव दिनुभयो । रासस
