काठमाडौं। काठमाडौंको नक्सालस्थित भाटभटेनी सुपरमार्केटबाट दुई लाख १७ हजार रुपैयाँ बराबरका सामान चोरी गर्ने एक जना पक्राउ परेका छन्।
पक्राउ पर्नेमा दोलखाको बैतेश्वर गाउँपालिका–२ का ३७ वर्षीय विमल श्रेष्ठ रहेका छन्, जो हाल भक्तपुरमा बस्दै आएका थिए। उनी सोमबार ग्रोसरी सेक्सनबाट चोरी गरी फरार भएका थिए भने मंगलबार दिउँसो प्रहरीले उनलाई पक्राउ गरेको हो।
श्रेष्ठविरुद्ध काठमाडौं जिल्ला अदालतबाट पाँच दिनको म्याद थप गरी अनुसन्धान भइरहेको जिल्ला प्रहरी परिसर काठमाडौंका एसपी अपिलराज बोहराले जानकारी दिए।
