काठमाडौँ। नेपाली कांग्रेसका सभापति शेर बहादुर देउवाले नेपाल राष्ट्र बैंकको गभर्नर पद कांग्रेसले पाउने पक्का भएको बताएका छन्।
पार्टी कार्यालय सानेपामा मंगलबार आयोजित कार्यक्रममा देउवाले गभर्नरबारे गठबन्धनमा सहमति भइसकेको र ढिलाइको कारण प्रधानमन्त्री ओली नभई राष्ट्र बैंकभित्रकै समस्या भएको स्पष्ट पारे।
गभर्नर बन्ने दौडमा रहेका कार्यकारी निर्देशक डा. गुणाकर भट्टले राजीनामा दिएका छन्। तर कामु गभर्नर निलम ढुङ्गानाले स्वीकृत नगरेकाले प्रक्रिया अघि बढ्न नसकेको देउवाको भनाइ छ।
भट्ट कांग्रेसको सिफारिसमा गभर्नर बन्न लबिङ गर्दैछन् भने ढुङ्गाना पनि दावेदारको रूपमा चर्चामा छन्। राष्ट्र बैंक चैत २४ गतेदेखि गभर्नरविहीन अवस्थामा छ।
