संखुवासभा । नेकपा एमालेका उपाध्यक्ष विष्णु पौडेलले जनताको अभिमतले केपी शर्मा ओलीलाई पुनः प्रधानमन्त्री बनाउनुपर्ने बताउनुभएको छ ।
सोमबार संखुवासभाको जिल्ला अधिवेशनलाई सम्बोधन गर्दै उहाँले सो कुरा बताउनुभएको हो ।
उहाँले भन्नुभयो, ‘केपी शर्मा ओलीलाई अदालतको अध्यादेशको आधारमा सत्याच्युत गरिएको छ, सरकारबाट हटाइएको छ । तर, हामी अदालतको परमादेशको आधारमा होइन, हामी जनताको जनादेशको आधारमा फेरि केपी शर्मा ओलीलाई प्रधानमन्त्रीको पदमा पुनस्थापित गर्न चाहन्छौँ । र विकासका, निर्माणका, समृद्धिका जतिपनि अभियानहरु रोकिएका छन् तिनलाई गतिशिल ढंगले अघि बढाउन चाहन्छौँ ।'
यस्तै, उहाँले एमालेको नेतृत्वको सरकारले मात्रै विकासका आयोजनाहरु पूरा गर्न सक्ने जिकिर गर्नुभयो । अरु भागका मानिसहरु संखुवासभामा बसाई सर्न चाहने हिसाबले संखुवासभालाई विकसित गर्न चाहेको उहाँले बताउनुभयो ।
