काठमाडौं। उच्च अदालत सुर्खेतले जाजरकोटको सोतीमा २०७७ जेठ १० गते नवराज विकसहित ६ जनाको सामूहिक हत्या घटनामा संलग्न २३ जनालाई जिल्ला अदालतले सुनाएको जन्मकैदको फैसला सदर गरेको छ।
न्यायाधीश सोमकान्त मैनाली र मातृकाप्रसाद भण्डारीको इजलासले दोषीहरूलाई २५ वर्षको कैद सजाय कायम राखेको हो। तर जातीय भेदभाव तथा छुवाछुतसम्बन्धी कसुरमा जिल्ला अदालतले सुनाएको दुई वर्ष कैद र ५० हजार जरिवाना भने बदर गरिएको छ।
घटनामा संलग्नहरूमा तत्कालीन वडा अध्यक्ष डम्बरबहादुर मल्लसहित नवराजकी प्रेमिकाका बुबा र दाजु पनि छन्। पीडित परिवारले जन्मकैद सदर हुनु न्यायको सन्तोषजनक पक्ष भएको बताएका छन्।
जिल्ला अदालतले यसअघि सोही गाउँका डम्बरबहादुर मल्ल (तत्कालीन वडा अध्यक्ष), नेत्रबहादुर मल्ल, रेशम मल्ल, सविन पुन, नवीनकुमार घर्तीमगर, विराज पुन मगर, धनराज राना, भीमबहादुर पुन, रमित पुन मगर, डिल्ली मल्ल ठकुरी, प्रेमबहादुर ठकुरी, सन्तोष मल्ल, मानबहादुर मल्ल, टोपबहादुर मल्ल, मोहन पुन मगर, इर्दबहादुर ठकुरी, तिलक चन्द, लिपेन्द्रकुमार मल्ल, हर्कबहादुर मल्ल, विनोद मल्ल र विष्णु मल्लसहित नवराजकी प्रेमिकाका बुबा र दाजुलाई जन्मकैदको फैसला सुनाएको थियो। उच्च अदालतले पनि सोही फैसलालाई सदर गरेको हो।
