एजेन्सी । पाकिस्तानका पूर्व विदेशमन्त्री बिलावल भुट्टोले भारतविरुद्ध भड्काउने भाषण दिएका छन् ।
शुक्रबार एक जनसभालाई सम्बोधन गर्दै उनले भने–या त हाम्रो पानी सिन्धु नदीमा बग्नेछ या त उनीहरूको रगत बग्नेछ । सिन्धु नदी हाम्रो हो र हाम्रो नै रहनेछ ।’
सिन्धु जलसन्धि एकैचोटि तोड्नु सम्भव नरहेको उनको भनाई छ । बिलावलले भने कि भारतको जनसंख्या धेरै भएकोले, उनीहरूले पानी कसको स्वामित्वमा छ भनेर निर्णय गर्न सक्दैनन् । पाकिस्तानका जनता बहादुर रहेको र आफूहरु बहादुरीका साथ लड्ने उनले चेतावनी दिँदै सीमामा आफ्नो सेना हरेक आक्रमणको जवाफ दिन तयार रहेको प्रस्ट पारे ।
पाकिस्तान पिपुल्स पार्टी (पीपीपी)का अध्यक्ष समेत रहेका भुट्टोले भारतले पहलगाम घटनाको लागि पाकिस्तानलाई दोष दिएको बताए । आफ्ना कमजोरीहरू लुकाउन र आफ्ना जनतालाई मूर्ख बनाउन मोदीले झूटा आरोप लगाएको र एकतर्फी रूपमा सिन्धु जल सन्धि रोकेको उनको आरोप छ ।
बिलावल भुट्टोले पाकिस्तानका चार प्रान्तको एकताको बारेमा कुरा गर्दै यी चार प्रान्त चार दाजुभाइ जस्तै भएको बताए । यी चार राज्यले मिलेर भारतको हरेक मनसायको उचित जवाफ दिने उनले बताए ।
भुट्टोको यो बयान यस्तो समयमा आएको हो जब भारतले पहलगाम आक्रमणपछि सिन्धु जल सन्धि निलम्बन गरेको थियो, जसलाई पाकिस्तानले ‘युद्ध बराबर’ भनेर वर्णन गरेको छ ।
