कैलाली। जिल्लाको कैलारी गाउँपालिकामा सुदूरपश्चिम प्रदेशका छ वटा स्थानीय तहको सहभागितामा नमूना गाउँसभा/नगरसभा अभ्यास गरिएको छ ।
गाउँपालिकाको सभाहलमा सुदूरपश्चिम प्रदेश अनुसन्धान तथा प्रशिक्षण प्रतिष्ठान पुना डोटीको आयोजनामा धनगढीमा नगरसभा÷गाउँसभाको नमूना अभ्यास गरिएको हो ।
नेपालको संविधानको धारा २२७ बमोजिम गाउँसभा तथा नगरसभाको कार्य सञ्चालन प्रदेश कानुन बमोजिम हुने प्रावधान रहेकाले सोका लागि प्रदेशले स्थानीय तहको सभा सञ्चालनसम्बन्धी ऐन, २०७५ जारी गरेको छ । सोही ऐन बमोजिम सुदूरपश्चिम प्रदेश अनुसन्धान तथा प्रशिक्षण प्रतिष्ठानको आयोजनामा छ पालिकाका प्रमुख, उपप्रमुख, प्रमुख प्रशासकीय अधिकृत, समितिका सभापतिको सहभागितामा नमूना अभ्यास गरिएको प्रतिष्ठानले जनाएको छ ।
नमूना गाउँसभा अभ्यास कार्यक्रममा गाउँपालिकाकोले वर्षे अधिवेशन र हिउँदे अधिवेशनमा गर्दै आइरहेको सम्पूर्ण प्रक्रियाका बारेमा अभ्यास गरेको छ । कार्यक्रमको सहजीकरण अधिवक्ता झङ्कर कुँवर, तेजराज उपाध्यक्ष र राजेन्द्रविक्रम शाहीले गर्नुभएको थियो ।
नगरसभा/गाउँसभा डेमो (नमूना अभ्यास) कार्यक्रममा डडेल्धुराको नवदुर्गा, अजयमेरु गाउँपालिका, अमरगढी नगरपालिका र बैतडीको पञ्चेश्वर, सिगास, डिलासैनी गाउँपालिकाका प्रमुख, उपप्रमुख, प्रमुख प्रशासकीय अधिकृत, समितिका सभापतिको सहभागिता थियो ।
गाउँपालिकामा आउनुभएका सबैलाई गाउँपालिकाका अध्यक्ष राजसमझ चौधरी, उपाध्यक्ष भगवतीकुमारी चौधरी, सामाजिक विकास समितिका सभापति सन्तराम चौधरी, प्रमुख प्रशासकीय अधिकृत खगेन्द्रराज जोशी, सामाजिक विकास शाखा प्रमुख यगम कलेल, योजना शाखाका प्रमुख सन्तोषकुमार चौधरी, प्रशासन शाखा प्रमुख सोमप्रसाद चौधरीलगायतले स्वागत गर्नुभएको थियो ।
