काठमाडौँ । प्रहरीले लुटपाटको आरोपमा २० जनालाई पक्राउ गरेको छ । पेप्सीकोलास्थित टाउन प्लानिङबाट ६० लाख रुपैयाँ लुटपाट गरेको आरोपमा उनीहरुलाई नियन्त्रणमा लिएर अनुसन्धान अघि बढाएको हो ।
बुधबार राति करिब ९ बजेतिर एक व्यक्तिको दुई वटा झोलामा रहेको उक्त रकम लुटपाट भएको थियो । लुटपाट घटनामा अनुसन्धान भइरहेको भन्दै प्रहरीले यसबारे थप जानकारी सार्वजनिक गरेको छैन ।
प्रहरी स्रोतका अनुसार लुटपाट भएको बताउने व्यक्ति बौद्ध बस्ने रितेश लामा रहेका छन् । रकम लुटिएपछि बुधबार राति नै उनी काँडाघारीस्थित प्रहरी प्रभागमा गएर घटनाबारे जानकारी गराएका थिए ।
जग्गाको बैना गर्न रकम लिएर आउनु भनेपछि उनी रकम लिएर गएका थिए । आफ्नो कारमा दुई वटा झोलामा ६० लाख रुपैयाँ लिएर गएको उनी बताउँछन् ।
जग्गाको टाउन प्लानिङमा पुगेपछि जग्गाबारे एक व्यक्तिसँग कुराकानी गर्दैगर्दा ८–१० जनाको समूह आएको र गाडीमा रहेको दुई वटा झोलोको रकम लुटेको उनले बताएका छन् ।
त्यसपछि प्रहरीले अनुसन्धान अघि बढाएको थियो । सिसिटीभी फुटेजमा देखिएअनुसार लुटेरा समूह मोटरसाइकल र स्कुटरमा चढेर फरार भएका थिए ।
पक्राउ परेका २० जनाबाट प्रहरीले ३० लाख रुपैयाँ बरामद समेत गरिसकेको छ । एउटा झोलामा रहेको २८ लाख ५० हजार एकमुस्ट भेटिएको छ । बाँकी रकम भने साँखु लगेर बाँडफाँड गरेको पक्राउ परेकाहरूले प्रहरीसमक्ष बताएका छन् ।
लामाले ६० लाख लुटिएको बताएपनि पछि हिसाब गर्दा भने ७६ लाख रहेको दाबी गरेको प्रहरीले बताएको छ ।
उक्त रकमबारे समेत प्रहरीले अनुसन्धान अघि बढाएको छ । उक्त रकम किन उनले नगदै बोकेर हिँडे र रकमको स्रोत के हो भन्नेबार समेत प्रहरीले अनुसन्धान अघि बढाउने भएको छ ।
पक्राउ परेकाहरूलाई प्रहरी वृत्त नयाँ बानेश्वरमा राखिएको छ । उनीहरुमाथि अनुसन्धान अघि बढाइएको प्रहरीले जनाएको छ ।
