बैतडी। बैतडीको पाटनमा आजदेखि दोस्रो संस्करणको उदयदेव प्रिमियर लिग (युपिएल) टि–२० क्रिकेट प्रतियोगिता सुरु भएको छ । पाटन भ्याली क्रिकेट क्लबको आयोजनामा सुरु भएको प्रतियोगिता पाटनस्थित श्रीकृष्ण माविको खेल मैदानमा एक कार्यक्रमकाबीच औपचारिक रुपमा उद्घाटन गरिएको छ ।
क्लबका अध्यक्ष सन्तोष जोशीको अध्यक्षतामा सम्पन्न उद्घाटन समारोहमा पाटन नगरपालिकाका प्रमुख गौरीसिंह रावल प्रमुख अतिथि रहनुभएको थियो । कार्यक्रममा अन्य जनप्रतिनिधि, समाजसेवी, राजनीतिक दलका प्रतिनिधि, खेलप्रेमीलगायत उपस्थिति थियो ।
उद्घाटन समारोहपश्चात् भएको खेलमा आजोजक पाटन भ्याली क्रिकेट क्लब विजयी भएको छ । सुखद सुरुआत गर्ने क्रममा भ्यालीले सिगास सेवा समाजलाई २४ रनले हरायो । जितका लागि पाएको १९९ रनको लक्ष्य पछ्याएको सिगासले निर्धारित २० ओभरमा ४ विकेटको क्षतिमा १७४ रन मात्रै बनाउन सक्यो ।
यसअघि टस हारेर पहिला ब्याटिङ गरेको भ्यालीले २० ओभरमा ७ विकेटको क्षतिमा १९८ रन बनायो । भ्यालीका लागि युवराज भण्डारीले सर्वाधिक ५० रन हिर्काए । आठ टोली सहभागी प्रतियोगिताको फाइनल खेल चैत २८ गते हुनेछ ।
प्रतियोगिताको विजेता टिमले रु एक लाख एक हजार १११ नगदसहित ट्रफी मेडल र प्रमाणपत्र प्राप्त गर्नेछ । यस्तै उपविजेता टिमले रु ४५ हजार ५५ नगदसहित ट्रफी, मेडल र प्रमाणपत्र पाउनेछ ।
प्रतियोगितामा म्यान अफ द सिरिजलाई रु आठ हजार ८४८, बेष्ट ब्याट्स्म्यान तथा बेष्ट बलरलाई पाँच हजार ५५५ र उदयमान खेलाडीलाई रु दुई हजार ५२५ नगदसहित ट्रफी मेडल र प्रमाणपत्र प्रदान गरिने आयोजकले जनाएको छ ।
पहिलो संस्करणको उदयदेव प्रिमियर लिग क्रिकेट प्रतियोगिताको उपाधि आयोजक पाटन भ्याली क्रिकेट क्लबले हात पारेको थियो । खेलकुदलाई पर्यटनसँग जोड्ने उद्देश्यसहित प्रतियोगिताको आयोजना गरिएको आयोजक पाटन भ्याली क्रिकेट क्लबले जनाएको छ । रासस
