
काठमाडौँ । बार्सिलोना स्पेनिस कप कोपा डेल रेको फाइनलमा प्रवेश गरेको छ ।
गएराति भएको दोस्रो लेगको खेलमा एट्लेटिको मड्रिडलाई १–० गोलले हराउँदै समग्रमा ५–४ को नतिजासहित बार्सिलोनाले फाइनलको टिकट काटेको हो ।
एट्लेटिकोको घरेलु मैदानमा बार्सिलोनालाई जित दिलाउन एकमात्र निर्णायक गोल फेरान टोरेसले गरे । उनले खेलको २७ औं मिनेटमा गोल गरेका हुन् ।
अब बार्सिलोनाले उपाधिका लागि रियल मड्रिडसँग प्रतिस्पर्धा गर्नेछ । मड्रिडले रियल सोसिडाडसँग ४–४ को बराबरी खेल्दै ५–४ को एग्रिगेटमा फाइनलमा स्थान बनाएको हो ।
फाइनल खेल अप्रिल २६ मा हुनेछ ।