काठमाडौँ । इंग्लिस प्रिमियर लिग फुटबल अन्तर्गत आर्सनलले जित निकालेको छ ।
गएराति भएको खेलमा आर्सनलले फुलहमलाई २–१ गोलले हराएको हो । घरेलु टोलिको जितमा मिकेल मेरिनो र बुकायो साकाले गोल गरे । फुलहमका रोड्रिगो मुनिजले एक गोल फर्काए ।
खेलको ३७ औं मिनेटमा मेरिनोले गोल गर्दै आर्सनललाई सुरुवाती अग्रता दिलाएका थिए । लामो समयपछि मैदानमा फर्किएका साकाले ७३ औं मिनेटमा गोल गर्दै घरेलु टोलिको अग्रता दोब्बर पारे । यता, खेल सकिनै लाग्दा फुलहमका मुनिजले गोल फर्काएपनि उनको गोल सान्त्वना गोल हुन पुग्यो ।
यो नतिजापछि आर्सनल ३० खेलबाट ६१ अंकका साथ तालिकाको दोस्रो स्थानमा छ । फुलहम ४५ अंकका साथ आठौं स्थानमा छ ।
यस्तै, गएराति नै भएको अर्को खेलमा नटिङहम फरेस्टले म्यान्चेस्टर युनाईटेडलाई १–० गोलले हरायो । घरेलु टोलिको जितमा एकमात्र निर्णायक गोल एन्थोनी एलंगाले गरे ।
उनले खेलको पाँचौं मिनेटमा नै गोल गरेका थिए । खेलमा युनाइटेडले पूर्णरुपमा दबाब बनाएपनि गोल गर्न भने सकेन ।
जितसँगै नटिङहम ३० खेलबाट ५७ अंकका साथ तालिकाको तेस्रो स्थानमा छ । युनाइटेड ३७ अंकका साथ १३ औं स्थानमा छ ।
