काठमाडौं । प्रमुख प्रतिपक्षी दल नेपाली कांग्रेसद्वारा गठित कोरोना अनुगमन समितिले महामारी नियन्त्रणको क्षेत्रमा फ्रन्ट लाइनमा खटेर काम गरिरहेका चिकित्सकहरुसँग आज अन्तरक्रिया गरेको छ । सो समितिले महामारीको अवस्थाबारे नेपाल चिकित्सक संघसँग छलफल गरेको हो । नेपाली काँग्रेसका सहमहामन्त्री प्रकाशशरण महतको संयोजकत्वमा गठित कोरोना अनुगमन समितिले शुक्रबार संघको कार्यालयमा पदाधिकारीहरुसँग छलफल गरेको हो ।
स्वास्थ्यकर्मीले भोगिरहेका समस्या र समाधानका विकल्पमा छलफल केन्द्रित थियो । छलफलका सहभागीहरुले महामारीका समयमा पहिलो लाइनमा रहेर काम गर्नुपर्ने चिकित्सकहरुको मनोबल बढाइ सेवा र सुविधामा सरकारले ध्यान नदिएको आरोप लगाएका छन् ।
अनुगमन समिति संयोजक एवम् सहमहामन्त्री महतले महामारी नियन्त्रणमा पहिलो लाइनमा रही सेवा गरिरहेका चिकित्सकहरुको मनोबल उच्च राख्न सरकारले सेवा सुविधा उपलब्ध गराउनुपर्नेमा जोड दिए । डा. महतले सरकारले स्वास्थ्यकर्मी तथा चिकित्सकहरुको संवेदनशीलता हेरेर उनीहरुको सेवा सुविधाका लागि काम गर्नुपर्ने सुझाव दिए । कार्यक्रममा समिति सदस्यहरु एनपी साउद, डा प्रभु बुढाथोकी, डा लक्ष्मीराज पाठक, राजिवविक्रम शाह, नैनसिंह महर र नेपाल चिकित्सक संघका पदाधिकारीहरु सहभागी थिए ।
