काठमाडौँ। नेपाली कांग्रेसले तीनकुनेमा भएको हिंसात्मक प्रदर्शनको सम्पूर्ण जिम्मेवारी पूर्वराजा ज्ञानेन्द्र शाहले लिनुपर्ने निष्कर्ष निकालेको छ।
शनिबार बुढानीलकण्ठस्थित पार्टी सभापति शेरबहादुर देउवाको निवासमा बसेको कांग्रेस पदाधिकारी बैठकमा गृहमन्त्री रमेश लेखकले घटनाको विस्तृत विवरण प्रस्तुत गरेका थिए।
बैठकपछि कांग्रेस प्रवक्ता डा. प्रकाशरण महतले पूर्वराजा ज्ञानेन्द्रले नै आन्दोलन गर्ने समिति बनाएको भन्दै सम्पूर्ण घटनाको जिम्मेवारी पनि ज्ञानेन्द्रले नै लिनुपर्ने बताए ।
उनले भने, ‘अराजक अवस्था देखाइयो । त्यसमा समीक्षा गरेर हिजोको घटनालाई गम्भीर भन्दै भ्रत्सना गरेका छौँ । निरंकुश शासनतर्फ लैजाने मनसायका साथ योजना बनाइएको छ । जहाँ जहाँ आक्रमण गर्ने हो योजनाका साथ भएको छ । अन्य कैयौँ घाइते भएका छन् । यसको सम्पूर्ण जिम्मेवारी पूर्वराजाले लिनुपर्छ उहाँले नै समिति गठन गर्नुभएको हो ।’
