काठमाडौँ । प्रतिपक्षी दलहरूको विरोधपछि प्रतिनिधिसभाको बैठक स्थगित भएको छ । सभामुख देवराज घिमिरेले आधा घण्टापछि बैठक बस्नेगरी स्थगित गरेका हुन् ।
सभामुख देवराज घिमिरेले सभा सुरु गर्ने वित्तिकै विपक्षी दलहरूले उठेर अवरोध गरेका थिए । त्यसपछि सभामुखले माओवादी सांसद शक्ति बस्नेतलाई बोल्न समय दिएका थिए ।
बस्नेतले सरकारले नेपाल विद्युत प्राधिकरणलाई विचौलियाको हातमा सुम्पिनको लागि कार्यकारी निर्देशक कुलमान घिसिङलाई पदमुक्त गरेको आरोप लगाए ।
दुई तिहाइको सामर्थ्य राख्ने सरकारले एक राष्ट्र सेवकको मानमर्दन गरेको उनको भनाई छ । प्रधानमन्त्री केपी शर्मा ओलीले घिसिङलाई हटाएको कारण नदिएसम्म संसद् चल्न नसक्ने उनले बताए ।
बस्नेतले आफ्नो भनाई राखेपछि सभामुखले सभा अगाडि बढाउदै गर्दा प्रतिपक्ष दलहरुले विरोध गरिरहे सभा अगाडि बढाउन पटक पटक आग्रह गर्दा पनि उनीहरुले अवरोध गरिरहेपछि सभामुखले बैठक आधा घण्टापछि बस्ने गरी स्थगित गरेका हुन् ।
