काठमाडौं । राष्ट्रिय प्रजातन्त्र पार्टी (राप्रपा) ले राप्रपाले राजसंस्था र हिन्दू राष्ट्रको समर्थन तथा संघीयताको विरोधमा जुन समूहले शान्तिपूर्ण आन्दोलन गरे पनि त्यसलाई समर्थन जनाउने निर्णय गरेको छ ।
आज बसेको राप्रपाको आन्दोलन मूल समितिको बैठकले यस्तो निर्णय गरेको हो ।
पार्टी अध्यक्ष एवं आन्दोलन मूल समितिका संयोजक राजेन्द्र लिङ्देनको अध्यक्षतामा बसेको बैठकले वैशाख ७ बाट निरन्तर राजधानी केन्द्रित आन्दोलन गर्ने निर्णय गरेको प्रबक्ता एवं प्रचार विभाग प्रमुख मोहन कुमार श्रेष्ठले जारी गर्नुभएको बिज्ञप्तिमा उल्लेख छ ।
यस्तो छ राप्रपाको आन्दोलन मूल समितिको बैठकले गरेको निर्णय
१) आम जनताको चाहना बमोजिम राष्ट्रिय हितको रक्षा गर्न, भ्रष्टाचार नियन्त्रण गरी मुलुकमा सुशासन कायम गर्न, राष्ट्रको विकास निर्माण अभियानलाई तीब्रता दिन, राजनीतिक स्थिरता प्रदान गर्न सरकार पूर्णतस् असफल भएको छ। यो केवल सरकारको असफलता मात्रै होइन, विद्यमान राजनीतिक प्रणालीमा रहेको समस्या हो। सरकारहरु परिवर्तन हुँदैमा वा गर्दैमा देश यथास्थितिबाट मुक्त हुन सक्दैन । यो विगत २० वर्षको अभ्यासले पुष्टि गरेको छ। देशले भोग्नुपरेको संकटपूर्ण अवस्था गलत मार्गँचित्रको परिणाम हो। राप्रपाले लामो समयदेखि त्रुटीपूर्ण मार्गचित्रबाट देश अघि बढ्न नसक्ने निश्कर्षसहित श्रृंखलाबद्ध आन्दोलन र संघर्षका कार्यक्रमहरु गरिरहेको र गत वर्ष फागुन ९ गते नेपाल सरकार समक्ष राजसंस्था र हिन्दुराष्ट्रको पुनस्स्थापना, संघीयताको खारेजी लगायतका राजनीतिक, सामाजिक र जनजीविकासंग सम्बन्धित ४० बुँदे मागपत्र पेश गरेको थियो। आफ्ना मागहरु पूरा गराउन र एजेण्डाका पक्षमा जनमत सिर्जना गर्न राप्रपाले आन्दोलन, संघर्ष र देशव्यापी प्रदर्शन तथा सभाहरु समेत गरिरहेको छ।
यसक्रममा अब राप्रपा,
क) राप्रपा अब सम्पूर्णरुपले आन्दोलन केन्द्रीत हुनेछ। आजको बैठकमा आन्दोलन मूल समितिको तर्फबाट समितिका सदस्य सचिव, प्रबक्ता ज्ञानेन्द्र शाहीद्वारा प्रस्तुत आन्दोलन सम्बन्धि कार्यक्रम र कार्ययोजना सामान्य परिमार्जन सहित पारित गरिएको छ।
ख) राप्रपाले चैत २६ गते काठमाडौंमा बागमती प्रदेश स्तरीय विशाल आमसभा गर्ने निर्णय गरेको छ। आमसभाका क्रममा व्यापक जनपरिचालन गरिनेछ। सभामा सबैको स्वामित्व बढाउन समान विचार राख्ने दल, अभियान, समुहलाई सहकार्यका लागि राप्रपा आह्वान गर्दछ, साथै आम जनसमुदायमा सहभागीताका लागि हार्दिक अपील गर्दछ।
ग) राप्रपाले २०८२ बैशाख ७ गतेदेखि राजधानी केन्द्रीत आन्दोलन गर्नेछ ।
घ) समान उद्धेश्य र विचार भएका राजनीतिक दल, संयुक्त जनआन्दोलन समिति, विभिन्न संघ संगठनहरुसंग सहकार्य, कार्यगत एकता वा मोर्चा गठन गरी आन्दोलनका कार्य अघि बढाइनेछ।
ङ) राजसंस्था तथा हिन्दु राष्ट्र पुनस्स्थापनाका लागि अन्य दल र अभियानहरुबाट आयोजना हुने सबै शान्तिपूर्ण र अहिंसात्मक कार्यक्रममा राप्रपाको सहयोग र समर्थन रहनेछ। साथै राप्रपाले आयोजना गर्ने आन्दोलनका कार्यक्रमहरुमा पनि सोही बमोजिमको सहयोग लिने र आवश्यकता अनुसार संयुक्त मोर्चा बनाइनेछ ।
२) नेपाल विद्युत प्राधिकरणका कार्यकारी निर्देशक कुलमान घिसिङ्गलाई केही समय कार्यकाल बॅाकी छॅदै बदनियतपूर्ण ढंगबाट सरकारले बर्खास्त गर्नु आपत्तिजनक छ।
मोहन कुमार श्रेष्ठ
प्रबक्ता एवं प्रचार विभाग प्रमुख, राप्रपा
१२ चैत २०८१
